kagenti apang tulus ngurukang malu pegawe pagentinna" Gusti Ngurah lantas nyerahang daftar konsep surat kaputusane.
"Nggih Pak, buin mani lakar peragatang tiang. Mangkin silakan Bapak ka umah dinas, antosanga teken ibu derika," aturne Pak Markus nampi daftar konsep surate. Gusti Ngurah nyagjagin rabinne ane mabresih-bresih di umah dinas. Tukang kebun lan buruhe sedeng repot magae ngatur meja, kursi, lemari muah ngentinin gorden ane sampun let. Yen cat tembok muah pager, mula kari bresih mara pesan suud malabur. Tukang kebune mula rajin matetanduran, punyan bungane sedeng nged mabunga. Cocok anggon maturan sesai. Bilang bucu di dorin bangunane ada punyan biu kapal ane endep tur samah donne.
"Tu Ngurah, sami sampun bresih, amung kain gordene dogen perlu gentinin wireh sampun buuk. Pak Abu sampun mrentahang ngacet temboke apang iraga ten buin repot. Indayang cingakin dipan lan mejane puter tiang apang sirep madulu kangin. Yen susunan dapure banggayang sampun kenten," aturne Ratna Dumilah ngalapor teken rabinne.
"Oh, melah yen keto. Mani payu makisid mai jam satu siang, apang denda maan matanding banten malu. Kenken payu meli busung ajak eteh-eteh ane lenan?"
"Sampun Tu Ngurah, nanging mangkin ngiring ngajeng malu. Tiang sampun meli nasi, nika mawadah rantang di meja makan. Ane lenan makejang sampun madaar nasi bungkus," Ratna Dumilah nandan rabinne, ka meja makan lantas ngajeng mabarengan. Suud ngajengang Gusti Ngurah ngeles bajunne lantas ngaukin David katunden ngalih papan lakar ngae plangkiran. Kabenengan pesan papan lan prabote genep ada di gudang, lantas kagaenang ukuran apang garapa teken s opire. Gusti Ngurah lantas nulungin rabine matetoesan ngae sampian,
164
