ibune nang ajak dadua nulungin mabelanja, yen mabresih-bresih jumah depang sopir lan tukang kebune ngalihang buruh. Tiang suud ngadaang rapat di kantor mara maan nelokin kema," kenten rembuganne Gusti Ngurah ajak rabinne indik rencanane lakar nyelepin umah dinase.
Maninne Gusti Ngurah masuk kantor kakawitin baan ngobrol uli hati-kehati ajak pegawene sebilang seksi utawi bidang kakaukin ka kamarne, uli seksi Rumah tangga, sekretariat, seksi simpanan, kas, transfer, kredit, laporan, pembukuan, muang ane lenlenan. Makejang katakonin indik makelonne magae derika, napi kasulitanne, kenken pendidikan lan kursus-kursus ane taen kamiluin, kenken kapangkatane, keluargane saha napi usul-usul utawi saran apang sida nincapang kemajuan BRI tongosne ngabdiang raga. Mula baud, yen ada pegawe ane matadah rimrim utawi tegang, raganne nyelagin baan carita ane lucu. Pamuputne Gusti Ngurah ngaptiang apang pegawene nyak seleg magae ngawangun desa, panegaraian ngutamaang BRI tongosne magae setata apang untung. Jam solas Gusti Ngurah mara rapat ngajak Kepala Tata Usahane, Seksi Rumah Tangga, Seksi Kredit, Seksi Dana, lan Jasa, gumanti lakar mindahang pegawene ane bas makelo di tugasne lebih teken telung tiban, apang maputer pada taen ngrasayang tugase ane lenan. Nika awananne apang pada saling bantu, saling ajahin nganti sajaan ngerti. Kepala Tata Usaha, Seksi Kredit, Seksi Dana, lan Gusti Ngurah padidi lakar maang kursus sabilang Buda lan Saniscara duang jam sasampune tutup kas. Magilihan maka dasar nincapang pelayanan BRI. Kaputusan rapate makejang matutang perlune ngalihang patugase apang gegaene tuara ngamedin, tur panawange mawuwuh sayan penter rikala ada ujian dinas.
"Nah, Pak Markus, lautang gaenang Surat Kaputusan indik pagilihan pegawene ngawit dina Somane niki. Nanging pegawene ane
163
