"Mara teka Pak Ngurah rasanne cara suba wawuh, di restoran jag bareng negak dadi ameja ajak kitorang. Ah, len pesan ajak ane suba- suba. Kikuk rasanne puk, kimud."
"Saja, icang takut ngiwasin paliatne. Rasa tawanga isin atine, mawibawa pesan."
"Araah, kamu orang tukang ngutil, tara ya saja mrasa teken dewek pelih" kenten para pegawene saling caritain. Gusti Ngurah lan rabinne masih merasa teken raganne maan perhatian teken pegawe lan para istrine. Lantas marencana lakar ngadakang rapat pegawe buin mani di kantor. Daftar pegawe saha strutur organisasine kateliti, kanggon bantang nyelehin kenken tetampen pegawene ane nyalanang tugasne suang-suang.
"Tu Ngurah, malih pidan lakar pindah ka umah dinase, apang tiang maan mataki-taki? Apang tawang napi kakurangan alat-alate di dapur, kamar tidur, lan ane len-lenan?"
"Nah, buin poan, kayang dina Budane. Buin mani jalan delokin malu sambilang mabresih-bresih. Sajabaning ento masih perlu ngae pelangkiran di kamar, muang tongos mabanten di ulun pekarangane sawireh iraga mara nyelepin umah, patut nunas lugraha."
"Nggih, nika wenten tiang ngaba sampian, tamas lan cemper ental manawi dados anggen. Yening canang sari lan ane lenan dados beliang busung, base, pamor, buah, lan woh-wohan benjang di peken. Sekar kaden wenten magenepan di kebun kantore apang alapa teken pak David. Anggen ngabenin beliang siap aukud anggen pesan, saha gerang, lan taluh. Yen kacang, komak miwah sambel saur tiang sampun bekelina ring ibu akopok uli Bali. Jaja basah manawi wenten di pasar, utawi ngae nagasari lan carorot acukupan."
"Nah, yen keto mani tiang nunden Pak Markus apang nunden Ibu-
162
