engsap meli sumaga utawi woh-wohane lenan. Suud mabelanja, Gusti Ngurah ngajakin makejang ka rumah makan sawireh sampun jam roras wayahne makan siang.
"Pak Markus, David, jalan ja madaar malu ajak makejang. Basang tiange masih sampun keroncongan, bandingang nyanan seduk di jalan," Gusti Ngurah nandan rabinne Makejang mangkin pakeremos madaar, nginum es lan ada masih ngalih teh, kopi, utawi bier. Gusti Ngurah mesen kopi susu, nanging rabinne mesen rujak blingbing, misi poh, gedang, bangkuang, lan katimun. Ibu-ibu ane negak di sampingne pada kenyem nolih pesenan Nyonya bossne. Di atinne pada ngrasanin yen Ibu Ratna Dumilah saja sedeng ngidam. Gusti Ngurah masih marasa rabinne buka kenten sangkala ten bani ngalarang.
Sasampune pragat pada madaar lan nginum, makejang kabayah olih Gusti Ngurah Darsana, lantas budal ngalanturang pajalane ka Atambua. Peteng sajaan mara pada teked jumah. Makejang pegawe lan kurenanne pakerimik nuturang indik perbedaan tingkah lan abahne Gusti Ngurah lan rabinne bandingang taken Kepala Cabang lan nyonyahne lenan.
"Pak, miribang rabinne Pak Ngurah sedeng ngidam ya Pak? Jegeg, alep, payasne adung kamben lan bajunna Pak Ngurah masih kalem, perhatian pesan taken pegawene"
"Saja Bu, dorang saja polos, nanging telaten pesan. Miribang nguasain saurah arih gagaen di BRI. Buktine naskah serah terimane ka cocokang makejang satonden katanda tanganin. Ada masih ane isinina catetan ane dadi perhatian utamane. Cara raosne Pak Bupati sawireh raganne uli Bali, dumadak nyidayang nincapang pikolih lan kredit para petanine," raosne Pak Markus nuturin kurenanne. Kenten masih grenggengan pegawene lenan, kayang sopir, jaga malem ane mean ajaka ngorta taken Gusti Ngurah nuturang.
161
