maan sumaga buka kene rasane."
"Nah, buin mani meli di Kupang apang liu asal tusing ngawinang basange." Gusti Ngurah saking asih ngusap-usapin cangkem rabinne aji saputangan tan mari nyubit cunguh rabine ane rungih saking gemesne. Rabinne negor tanganne masemu manying. Pamuputne makadadua tusing payu sirep sawireh macanda saling sopin sumagane manis.
Maninne nurupute rombongan Pak Abune majalan dadi telung montor ngatehang teked di lapangan terbang El Tari Kupang. Para Kepala Cabang ane lenan uli SoE, Kefamenanu, Kupang lan Kalabahe pada sampun teka saha nyonyahne suang-suang. Sampune madabdaban lakar boarding Pak Abu lan nyonyahne lantas masalaman ajak ane ngatehang, uli para Kepala Cabang lan Ibu saha pegawe BRI Atambuane makejang. Ada masih ane maang bunga anggrek anggon ucapan selamet jalan, nyiriang katulus asihne.
Ratna Dumilah maang Ibu Abu bungkusan mapita biru maka cenderamata kulawarga BRI Atambuane. Isinne tuah kain saperadeg tatenunan asli Atambua utawi Kupang.
"Selamet jalan, lan kanggoang niki anggon temon-temon apang ten engsap teken tanah gersang kabupaten Belune," aturne Ratna Dumilah saha meluk Ibu Abu kasih-asih. Gusti Ngurah masih masalaman ngajak Ibu lan Pak Abu. Makejang lantas menekang lima madaag-daag ngalepas timpalne ane maan tugas anyar di Kantor Daerah BRI Makassar. Sasampune kapal terbange nambung keambarane, pangatehe lantas malipetan budal kumahne suang-suang. Gusti Ngurah lan rombonganne magumana apang maan singgah ka peken mabelanja kaperluanne suang-suang. Ada meli pakean, ada masih meli ebe lan gapgapan kanggon panak-panakne. Gusti Ngurah matueling rabinne apang tusing
160
