makejang budal, masalaman saling ngucap selamet. Kari Gusti Ngurah ajak rabinne saha para pegawene makejang matetamped, mabresih- bresih. Sisan jaja, masakan muah inum-inumane kabagiang teken para istrine ane tuyuh.
"Nah, Ibu-ibu nika sisan jaja muah masakane ane kari dadi daar, utawi dum-dum aba mulih. Piring, gelas, lan piranti lenen ane ben nyilih bresihin lantas ulihang. Tiang buin mani lakar ngatehang Pak Abu ka Kupang. Suud nika yen sampun tiang nongosin umah dinase mara tiang lakar ngajak Ibu-ibu marembug," alus Ratna Dumilah mabesen teken para istrine ane mabriuk matutang. Gusti Ngurah masih ngumpulang para pegawene nugasang ane lakar milu ngatehang Pak Abu ka Kupang ajak telung montor. Jam empat mara Gusti Ngurah ajak rabinne mulih ka hotel kaateh olih sopire Pak David.
"Beh, cukup leleh tiang mapayas buka kene uli semengan Tu Ngurah."
"Nah, jani dadi mareren. Bukak pakeane apang bebas, nyanan jam lima mara dadi mandus. Tiang masih lakar ngisis malu dini," Gusti Ngurah nyelempang di sopane Rabinne nyelempang di pasirepane glayah-glayah saking lelehne kecagcag-kecigcig.
"Tu Ngurah, tulungin ja pelutang tiang sumaga. Nika ambilang di tase, tiang nyud pesan itunian jemak tiang sisanne kari tatelu," aturne Ratna Dumilah matadah manying.
"Ooh nah denda, nongos dogen malu, tiang nyemakang," Gusti Ngurah matangi ngambilang saha melut sumagane lantas ngesopin rabinne ane kari ngidem ciplak-ciplak satmaka sampine ngilag ngrasayang jaen sumagane nganti katulang sumsum.
"Ooah, manis jaen pesan rasan juuke deriki Tu Ngurah. Kadi rasa adasa telah baan tiang ategakan. Adenan kuangan nasi yen sampun
159
