kapepenga pisan. Tan mitahen yen Tu Ngurah rauh dinane mangkin, santukan cutine kocap aminggu."
"Nggih Wak. Tiang ngamaluin meriki sawireh ada tugas penting di Kantor. Ten ngaden lakar nemu baya di sampune kapale lakar malabuh di Ampenan. Nadak saget ada arus lan ombak gede ngampihang kapale ka pasisi. Sepanan nahodane ngipekang kapale saget suba nabrak jembatan pelabuhane lantas mabinder anyud tur kandas di loloane nabrak parangan. Muatane tingkeb ka pasisi alah sapuang. Tiang maan nulungin anak kelem dadua aba ka sisi. Nanging dugase buin ka tengah ngaba jukung lantas kaleleb jukunge puntag-pantiga teken ombake tur uncalanga ka sisi ajak asia. Tiang tusing inget buin. Inget-inget suba dini," kenten Gusti Ngurah matuturan saha menahin bajunne. Lale Dumilah ngusuh-usuhin raganne saking rasa welas asih.
"Yen kene, ten telas barang-barange anyud, Tu Ngurah? Tiang engsap ngabaang pasalinan. Melahan mangkin Yan Galang malu pesu katoko delodne meli baju lan kamben sarung anggon pasalinan, mancan nyanan teked jumah," kenten Lale Dumilah lantas mesuang pipis baanga Wayan Galang ane gageson pesu ngajak Luh Purnama. Made Sinar iteh mecikin cokorne Gusti Ngurah ane kari nyem cara batis katak. Dikenehne makejang angayubagia sawireh ane katresnain sida selamet uli pancabayane. Pintune saget buin mampakan. Perawate teka ngabaang rangsum sanja luire bubuh, taluh malablab, jukut bayem, tahu, tempe, lan be siap masitsit. Tan mari masih mimbuh ubad pil telung macem. Lale Dumilah nyemak piring bubuhe lantas maekang tegakne lakar ngesopin gelanne.
"Nggih Tu Ngurah, ajengang malu bubuhe apang nyidayang ngajeng ubade," kenten Lale Dumilah saha nyendokang bubuhne, nanging jemakina teken Gusti Ngurah.
8
