"Nah, depang suba tiang ngajeng padidi, kari nyidayang. Bayune suba seger mara makejang teka mai. Buin jebos tiang lakar mulih," kenten Gusti Ngurah Darsana.
"Beh, Tu Ngurah ajum. Ten dados kimud. Baang anake denda Milah ngayahin di kabenengan buka mangkin." Made Sinar ngewerin Lale Dumilah ane sayan kabelet.
"Sajaan, sira buin elekin. Ada Wak, ada Made Sinar ane biasa ngayahin jumah," kenten Lale Dumilah saha nyemak sendoke ngesopin Gusti Ngurah. Yapin matadah kimud, Gusti Ngurah masih payu ngajengang kasopin teken Lale Dumilah. Wayan Galang lan Luh Purnama teka ngaba bungkusan saha makenyem nepukin Gusti Ngurah sopina teken gagelanne.
"Naah, nika mara ja cocok, apang enggalan seger," kenten Wayan Galang lantas mukak bungkusane di arepanne Lale Dumilah,
"Niki baju lan celana ukuranne Yan Galang. Niki pakaian dalem, niki kamben sarung. Dumadak Tu Ngurah cocok. Yen ten cocok, banggayang Yan Galang pidan nunas," kenten Luh Purnama saha ngeberang panganggone.
"Beh, mula duweg pada milihin warna lan ukuran panganggo. Yen celananne mirib lantangan buin abedik. Nanging dadi lepitang." Sasampune Gusti Ngurah suud ngajeng bubuh lantas ngajengang pil. Kabenengan dugase nika teka dokter lan perawate lakar mreksa. Luh Purnama, Made Sinar, lan Wayan Galang makiles pesu. Pan Kobar lan Lale Dumilah kari tetep nongosin Gusti Ngurah mapreksa.
"Nggih, sampun becik. Sampun seger maka jati mula. Napi niki sametonan duene rauh?" Kenten doktere matakon teken Pan Kobar lan Lale Dumilah.
"Inggih Pak Dokter, tiang mula sane ngiring ragan idane deriki
9
