"Ooh, ten kenken. Mangkin sampun eling. Melahan mangkin delokin ka Rumah Sakit Mataram kamar no. 9," Kenten perawate lantas pesu karurunge numpak sepedane. Wayan Galang enggal nyemak montor. Pan Kobar lan Made Sinar gageson ngundebang paon lan balene sawireh memenne dereng teka. Seregne ka singidang di apit-apit ampike ane sampun biasa tongosne ngengkebang yen ngalahin umah. Lale Dumilah lan Luh Purnama malaib ka dununganne magenti baju lan nyemak dompet. Sira nawang ada kaperluane nadak. Sasampune sregep makejang menek, magerung montore gasir majalan ngawangang ka RSU Mataram, lantas macelep ka parkir sisi kanginne. Pacaburbur Pan Kobar, Lale Dumilah, Luh Purnama, lan Made Sinar katututin Wayan Galang ngojog kamar nomor 9. Perawate sampun ngantiang diarepan pintune.
"Raris Pak Wayan, niki kamarne. Raganne kari elapina teken perawate," kenten perawate matujuang kamarne. Sasampune ngantiang ajebos disisi, pintune saget mampakan. Perawate pesu ngaba waskom misi yeh anget lan lap. Tuara buin ngantiang tundena macelep, Lale Dumilah saget macelep. Paling paliatne ngalihin Gusti Ngurah ane kari malinggih menjuh ori nyaluk baju biru rumah sakit, sawireh bajun raganne ane anggona telah belus. Mara matolihan cingakina Lale Dumilah, Luh Purnama, Made Sinar, Pan Kobar, lan Wayan Galang. Gusti Ngurah macanegan bengong, nanging maksaang masih makenyem. Lale Dumilah tuara nyidang ngangget kenehne, lantas enggal nyagjagin meluk Gusti Ngurah Darsana sambilanga ngeling. Kenten masih ane lenan pada ngelut saha ngembeng-ngembeng yeh paningalanne. Pan Kobar alon maakin saha matakon sambilanga negak di bangkune.
"Sapunapi mangkin, napine sane sungkanang? Titiang jag
7
