malu ngajak Tu Ngurah. Kaden ipah Dendane masih uli Bali. Pantes rembugang ajak beline ane suba ngelah pangalaman malunan, apang bani morahan teken reraman Dendane. Eda jag bengong keto, cara tusing ngelah timpal ajak mabligbagan." Luh Purnama nuturin timpalne apang tunayan sedihne. Mara Lale Dumilah manggutan, sredah sebengne. Sasampune suud nindes, Luh Purnama lan Lale Dumilah pesu malali kumahne Pan Kobar. Teked derika dapetanga Wayan Galang lan Pan Kobar mareraosan ngajak perawat uli Rumah Sakit Umum Mataram ane ngabarang yen kapal Pulo Bungine kampih di Maninting saking uyak ombak gede di Pelabuhan Ampenan.
"Sapunapi Pak, wenten sane ka bancaran?" Kenten Luh Purnama matakon.
"Nggih, wenten. Nanging ten wenten sane ngantos ngemasin. Mangkin kari sareng papitu sane dereng dados mulih. Nika awanan tiang meriki ngabarin Pak Wayan mangda nyingakin ka rumah sakit," kenten perawate negesang makire pesu karurunge.
"Sira Wak, napi ada keluargane ane kasengkalan?" kenten Lale Dumilah matakon saha nesekang. Bayunne buin nregdeg kambang ngalayang rasa kasawang.
"Ooh, sabar Denda, Luh pada, sing kenken. Tu Ngurah selamet suba katulungan, nanging tonden dadi mulih. Jalan jani iraga ka RSU nelokin," kenten Pan Kobar alon nyapsapang. Nanging pirenga teken Lale Dumilah cara munyin kilape nyanderin.
"Napi, Tu Ngurah sampun rauh, tur kabencanan? Ah, ... Wak, ...Wak, ...Paak, sapunapi kawentenanne, nawegang tulungin Pak, tiang mangkin jaga merika, Oooh." Lale Dumilah paling pati jelamut ngepes yeh mata tur ngisi limanne Pan Kobar, buin nandan Made Sinar lan Yan Galang apang enggal mesuang montorne.
6
