pati peteng lemah ngayahin rikala tiang kasengsaran, keto masih Wak ajak Memek nganggap tiang panak sing sida baan tiang lakar masilihin. Ten ada maelan teken tresnane ane sujati.” Gusti Ngurah ngembeng- ngembeng toyan pannone. Tanganne kari milih-milihin kadone lenan.
“Nah, niki nyanan baang Klian lan kramane ane majati kanggoang cangkir pada matengah lusin. Yen truna-trunine ajaka lalima kanggoang anduk pada mabesik. Sisanne lakar aban tiang ka Bali. Wak ane ngaba ajak barange lenan.” Gusti Ngurah lantas ngumpulang sisanne wadahina kardus.
“Nah suudang malu amonto, mani buin tampedang. Jani cening ajak dadua mereren malu. Melahan sirep, padalem Ibu cening Ratna suba lesu buina mara segeran.” Ibunne nunden mantune ka kamar. Wayan Rempuh lan panakne munduhang prabotane ane momos lakar umbah nyanan sanjane. Gusti Ngurah nuutang pandikan ibunne lantas nututin rabine sirep. Suryane ngarorokang sayan makelo sayan surup nyaluk sanja.
100
