pidan nyud mulih ka Baledan. Memek ajak Wak satata majanji dogen, ngakuang lakar ngajak nelokin umahe, kayang jani pelan amone geden tiange sing taen ajaka,” raosne Made Sinar nyelag mamelas.
“Beneh saja keto. Padalem Luh Ade. Nah lamun keto jalan suba Luh ajak meme milu luas, apang tepuk Tu Ngurah makerab. Meme kangen pesan nyud nepukin Tu Gek Darsini lan ibunne makelo tusing taen tepuk,” Wayan Rempuh mutusang rembugane.
“Inggih yen sampun kenten becik benjang mataki-taki ngepak barang sane encen jagi bakta lunga. Nanging ampura titiang wau nyidayang mamargi malih tigang raina, santukan malih kalih raina kari ngalap kopi sambilang ngrereh napi ko akedik anggen gapgapan. Nembe budal ka Baledan.” Aturne Pan Kobar ngitung-itungin nyamanne di Bali. Gusti Ngurah Gede lan rabinne matutang. Ratna Dumilah makenyem ngelut Made Sinar saling sigit ben tiang manahne. Gusti Ngurah lantas mesuang kado-kadone lakar pilihina, encen ane lakar maba ka Bali, encen lakar bagianga teken patulunge utawi ane lakar baanga kulawarganne Meme Rempuh. Gusti Ngurah makisi-kisi teken rabinne.
“Nggih, niki kanggen Tu Aji sareng Ibu sami maperadeg. Niki Wak Pan Kobar lan Memek Rempuh, kamben endek lan piring gelas misi kalung anduk, Yen niki ja kain baju brokat ajak selendang paling santep Luh Ade ajak Luh Purnama. Nanging yen warnanne mirib Luh Ade cocokan ane oleman. Naah niki ja, kain celana lan kemeja cocok anggon Yan Galang.” Ratna Dumilah nyacarang patutanga teken rabinne.
“Beh tiang maan magenepan, kaden tiang ten ngaturin napi-napi anggon kado,” Yan Galang masaut sada nundikin gagelanne. “Luh Purnama ngaturin apa?”
“Oooh Yan, Luh pada makejang. Magenepan ane suba triman tiang nganti sing sida baan tiang ngitungin. Tresnan ragane manyama, mabela
99
