Kaca:Gita Ning Nusa Alit.pdf/107

Saking Wikisource
Kaca puniki kavalidasi
MAKEBER TAN PAKAMPID

Maninne semengan truna-trunine sampun teka lakar matetamped ngeles bale. pawedaan lan ngulihang kursi muah prabote lenan. Gusti Ngurah lan rabinne mara pesan suud masiram. Aji lan ibunne sedeng milihin sokasi muah kardus anggon wadah barange ane lakar maba buin mani apang gindil tuara liu ngonyang tongos di pesawate. Suryane mara dauh pisan, tejanne ening. Langite galang tan katawengan amubu nang akelabar. Luh-luhe ane ngumbah prabot sambilanga macanda tan mari saling tundikin nyledetin pengantene ane mara suud masiram. Matadah kecud nanging jegege sayan mawuwuh rikala rambutne magambahan belus nekepin dadanne putih gading. Sasampune magenti panganggo lantas matinggih di bale daja. Luh Purnama lan Made Sinar sampun sayaga ngaba kopi lan jaja acukupan patulunge ane teka, lantas kacacarang di tikehe.

“Made Artha lan jegeg-baguse pada makejang mai malu ngopi anggon panganget. Nyanan buin terusang gaene. Padalem nak’e Luh Ade ane sampun ngaenang. Ene ane misi sendok kone kanggon Made Artha. Mirib racikanne spesial, yen liunan gula apa misi madu sing tawang.” Gusti Ngurah ngaukin truna-trunine matadah banyol. Timpalne pada mabriag nandan Made Artha ajaka ka paon. Nanging Made Sinar enggal teka nyagjagin.

“Kene, Bli Made anak tusing biasa ngopi. Nanging yen kopi misi madu mara nyak inema. Ento sangkala tiang ngisinin tanda apang sing madukan,” raosne Luh Ade manis.

“Yen keto Bli masih nyak Luh. Apa buin yen misi taluh siap ajak mica bubuk, bah jag bisa kayang makatengai ia magae sing kuangan bayu,” timpalne lenan nyautin. Made Sinar kenyem nyledetin pengantene, inget

101