dados ikuh, sapunapi ja Tu Ngurah, mangda sapunika taler ring tiang."
Ratna Dumilah lantas nyilahang tamiunne ngawedang. Gusti Ngurah
mapindah-pindah malinggih apang makejang timpalne maan ajaka
ngorta. Luh Purnama lan Made Sinar sampun ngimbuhin ajengan lan
ulame anggon cawisan buin apaletan. Sampune suud ngawedang
tamiune lantas katurin ngajengang. Makejang pada mimbuh nasi lan
ebe kanti sajan wareg. Ada masih ane nunas sirup, limun, bier, lan
temulawak. Jam satu makejang tamiune mapamit budal. Makejang
masih nyalamin Gusti Ngurah lan rabinne, aji lan ibunne pada
angayubagia. Mangkin giliran truna-trunine ane madaar.
"Nah jani Yan Galang ajak Luh Ade, kinkinang suba truna-trunine
madaar dadi telung sela apang tusing enggalan seduk. Luh Purnama
kema aturin malu pengantene ngajengang. Padalem dane kluen repot
nganemin tamiu uli tuni." Wayan Rempuh lan Pan Kobar ngenterang
panak-panakne apang patulunge madaar. Ibu lan ajinne masih milu
marame-rame ngambil piring nimpalin okanne ngajengang. Pakremos
jani robane lan truna-trunine madaar saking manah liang. Katuyuhane
dadi pangayah.tusing merasa.
Amaq Tirah Ian Pak Badrun lega
manahne ningalin pengantene selamet nyidayang ngalaksanayang
upacarane nganti puput. Napi buin Loq Sudangsa bagia manahne
ngelah keponakan Made Sinar cacep lan pagah pesan nyemak gagaen,
nganti ten rasanina yeh paningalanne ngetel di pabinanne ben leganne.
Sasampune suud madaar truna-trunine mapamit budal kumahne soang-soang. Kari robane dogen nampedang ane kari masisa patut aba kapaon
apang ten mabrarakan. Gusti Ngurah lan rabinne macelep ka kamar
lantas masalinan. Sumpek rasanne, apang elahan ngisis ngilangang
kenyelne. Mangkin sasampune pada malinggih di bale daja, Pak Badrun
lantas nunas mapamit.
96
