"Gusti Ngurah, Mekele Dumilah, Gusti Aji lan Gusti Biang sareng
sami, titiang
sampun nunas, sampun manggihin upacarane puput.
Mangkin jaga mapamit mungpung kari selid. Ampurayang ten sareng
ngatehang lunga. Ring pondok padalem sue kaonin. Dumadak pada
rahajeng sida matemu malih." Aturne Pak Badrun patutanga teken
Amaq Tirah Ian Loq Sudangsa. Gusti Ngurah makisi-kisi ajak rabinne
lantas ka kamarne ngambil kamben, baju lan udeng batik pilihina
uli kadone ane baanga teken timpalne, saha amplop misi pipis lakar
baanga Amaq Tirah. Loq Sudangsa bungkusanga jiket lan baju trening
olah raganne. Kanggon Pak Badrun kabungkusang baju sapari selem
ane biasa angge upacara adat. Makejang sampun kabungkus rapi olih
rabinne pedidi. Gusti Ngurah buin medal saha nunden Made Sinar
ngaenang kopi saderenge pada majalan.
"Pak Badrun, Amaq Rah, lan Loq Sudangsa, tiang ajak makejang
ten bisa buin ngomong napi. Amung matur suksma pang banget tiang
sida mragatang upacarane niki. Yen tan wenten Amaq ane nulungin
mirib kenken kaden panadian kurenan tiange maan cobaan buke kene."
Kenten Gusti Ngurah lan rabinne satmaka sibarengan.
"Gusti Ngurah, sampunang nika bangetanga. Tiang amung
ngamargiang kemaon saking swecan Gusti Allah sane ngicen segere.
Nah, niki kari wenten tamba lanturanne bakta anggen mangda sida
punah bresih panyungkane." Amaq Rah mesuang lengis abotol cenik
aturina Gusti Ngurah Darsana. "Dados campurin taluh madu. Yen
sampun becik rasanne banggayang anggen gagemet bakta lunga.
Manawi wenten gunanne."
"Nggih matur suksma. Mangkin sambilang malu ngopi sampun
dingin," Gusti Ngurah nyemakin lengise lantas ngawangsitin rabine
nyerahang bungkusane. Aji lan ibunne makenyem nyilahang tamiunne.
97
