Pedalem adik Dumilah mara segeran. Banggayang Nengah Sunia apang
mapagin meriki jam pitu, nggih. Selamet, selamet." Kepala lan Ibu buin
masalaman lantas pamit pesu kaatehang olih pengantene.
Pegawe BRI ne ane mara teka lantas magrudugan nyalamin Gusti
Ngurah lan rabinne. Seleng genti nagih mapotret ngajak pengantene.
Ada ane garegetan ngimpek, nyigit pengantene ben gemesne nepukin
Gusti Ngurah meneng-meneng jag nganten.
"Gusti Ngurah, doong griep-griep baleman sambuk, mara
ada angin jag ngrepet. Kaden ja Gusti Ayu Sri gelanne, tahu-tahu
masemeton. Kaden ane paekan Made Sinar, utawi Luh Purnama masih
ten. Pamuputne ane paling joh Lale Dumilah maan jawatan. Sajan ene
madan jodoh matemuang Gusti Ngurah pindah uli Bali ka Mataram
mapagin Lale Dumilah lakar ajaka ngalanglang buana buin pindah ka
BRI Atambua di perbatasan NTT paek ka Australia, teruus milehan
...ha ha ha," raosne Ahmad Duladip ngulgul pengantene. Makejang
ngajum kajegegan lan bagus ngantene satmaka patemun muncuk
Gunung Agung lan Gunung Rinjanine. Kepala Tata Usahane buin teka
maekin saha nyuun kotak mrepat ukuran 30 cm kibik mabungkus kertas
kado serahanga teken Ratna Dumilah. Pegawene ane lenan sajaba ane
ngaba kado, masih ada ane ngaba amplop serahanga teken pengantene
dugase masalaman.
"Inggih Ibu Ratna Dumilah, kanggeang niki cenderamata samatra
saking pegawe BRI Mataram sairing doa selamet menempuh hidup
baru, selamet jalan selamet matugas, turmaning yen wenten kirang langkunge mangda sweca ngampurayang."
"Beh, Bapak lan Ibu sareng sami, tiang sane matur suksma,
sekalian nunas pangampura. Dereng naen matemu sampun mapamit.
Malah akehan sane dereng kenal sareng tiang. Nanging tiang anak
95
