"Inggih Ida surya, Bapak, Ibu kalih sameton sareng sami. Upacarane
sampun sida puput. Titiang sareng keluarga sami matur suksma pang
banget antuk ledange sami ngrauhin lan ngicen doa restu ring pianak
lan mantun titiange sane wau nincap grhasta. Dumadak Sang Hyang
Widhi Wasa ngicen kretha wara nugraha antuk susrusa kahyune
sareng sami. Semalihe galahe mangkin taler anggen titiang nunas
geng sinampura prade wenten kaiwangan pianak titiange, santukan
jaga pindah ka BRI Atambua. Dumadak pasawitrane sane becik tetep
adung salawase. Taler titiang nunas geng sinampura yen wenten kirang
langkung panyembraman titiang nyanggra pangrauhe kadi mangkin.
Atur titiang nenten panjang. Ngiring durusang ngajengang sawentene,
ambilang ngraga."
Gusti Ngurah Gede ngaturin Kepala Cabang BRI paling maluna
matangi. Raganne nyalamin pangantene saha mesuang kotak misi
bungkung salukanga ka jrijinne Gusti Ngurah lan rabinne olih ibu, lan
bapak Kepala Cabang, mara lantas ngambil ajengane di bale dangin,
kalanturang teken pegawe lan tamiune lenan. Made Artha ane maan
tugas motret kecag-kecig milihin ane patut kapotret. Jam roras tamiune
suud madaar lantas buin kalanturang baan tamiune pegawe BRI ne
ane lenan. Padanda istri lantas kairing Pan Kobar buin mawali ka Gria
kadulurin atur suksma pengantene.
Kepala Cabang buin maekin Gusti Ngurah lan rabinne makisi-kisi.
"Dik Ngurah, buin pidan lan sareng sira dogen payu budal ke
Bali?"
"Tiang sareng patpat, Aji lan Ibu sareng ngatehang lunga malih
kalih raina."
"Nggih yen kenten tiang lakar ngatehang teked di Selaparang.
Tiket pesawate hadiah saking BRI apang enggalan teked di Bali.94
