151. Risedek nyalanang duta, tuara tahu nyang nyinyik, dutane apang da linyok, mangorahang nene jati, yadin mamati-mati, saking silib masih liyu, ne bakat laksanayang, upeksane jani buwin, tuara ngitung, kangge anake elenan.
20b.
152. Ento dayane telulas, sang ratu wenang mangisi, selid sanja mangrawos, ngitungang upaya sandi, tuara da dadi kasih, tekening sang ratu-ratu, puniki cacakannya, tuara nyandang ajak asih, tan rahayu, yen ajak matunggal daya.
153. Ratu cenik ratu tua, ratune takut ken istri, ratu loba ratu linyok, teken panjak sai-sai, ratu gering anggirih, ratu manuwukin kayun, ratu gedegin rowang, len ratu gedegin wargi, ada ratu, getape teked katulang.
154. Ratu gedegin pamitra, ratu tan jenek di puri, ada buwin ratu nene keto, tan pangidep ujar yukti, ratu manyacad Aji, ratu liyu ngelah musuh, ratu manyacad berata, upadrawa antuk widi, buwin ratu, manggawe panjake layah.
155. Ratu tuara ada bisa, masiat kalaning wengi, ada ratu tan pagugon, satia brata nene luwih, ratu manyacad widi, ento ratune rong puluh, pada cacakan kalah, punika nyandang musuhin, ban sang ratu makayun ring suka daya.
21a.
156. Kene to makrana kalah sang ratune enu cenik, panjak nyane pada momo, tuara ada mangajahin, matakon tuara polih, tekening ida sang ratu, dadi tuara masiat, sapanjak-panjake sami,
apan ratu, ia nu kuang prabawa.
157. Kalah sang ratune tua, muang ratu gring anggirih, pada duhkanira karo, kacampahin sai-sai, dening ida tong dadi, manyalanang bendun kayun, dadi mawetu kalah, yan ratu gedegin wargi, masih talu, brayane ngelong pitresna.
158. Kalah ratu ane getap, bumara siat malaib, buka tuara taen lonjok, panjake ia bareng lilih, ratu takut teken istri, bumara ngarepin musuh, panjake pada tinggal, upahe takut ken istri, dening malu, manganggo pangrasa lua.
95
