143. Sampun enden pati ngidepang, saatur bapane sami, dening bapa mula belog, kawonang antuk Pan Bungkling, becik pilih-pilihin, engken ja mantuk ring kayun, Gusti Agung nunasang, durusang medalang sami, titiang ratu , ne mangkin ngiring pisan.
19b.
144. Niki Gusti piarsayang, dayane sakaring Aji, sadgunane paling abot, manimbal sapta prawerti, nika mula piranti, manggawe suka tan surud, engken madan sadguna, sapunika to I Gusti, titiang ratu, mangkin mambalikin satua.
145. Sandi Wigraha sasana, dwi wiboga manyarengin, ayana punika reko, saraya malih ngentosin, yen munyi cara bali, puniki piteges ipun, sandi madan samitran, wigraha matukar Gusti, yan mangebug, punika madan ayana.
146. Sajana ia madan ungguan, asraya mangalih kanti, dijalan panjake soroh, di jumah meten abagi, luas tunden abagi, duwi wibaga wastan ipun, nika madan sagduna, malih asapta prakerti, titiang ratu, mangaturang keni pedas.
147. Dana maka miwah beda, sama Ian dana mangiring, maya indrajala kawot, upeksanto dadi pilih, teges ipun puniki, dana maweh sarwa luwung, ring panjake makejang, samada suhun ngajahin, da suwud, magawe leganing panjak.
20a.
148. Nika ne maadan danda, jalane mamati-mati, anak ento paling abot, manimbang panjake sami, apang sengeh ngencanin, tuara ada labuh kalangsuh, jalane ne sayangang, salah orahang da pilih saru-saru, dadi mademen-demenan.
149. Da nyalanang totonan, mandanda ne tuara sisip, yadin te jalema belog, buwin tuara kasenengin, yadin jalema miskin, lamun nyama manggih patut, rawosin apanga menang, inggih sapunika malih, mangde tutug, ·makejang sami midarta.
150. Ngawe apang kasub melah, kasub aeng kasub ririh, kasub kereng kagagawok, di jagate tan patanding, ne madan indra warih, dayane malingang musuh, panga salah jaganan, panga salah liyu sai, salah unduk, salah mesuang upaya.
