123
2. Wenten pangguh anak katah, masangkepan mangrawos sating lengkungin, punika sengguhang ipun, ngedekin mangawe jengah, raris budal, sebeng nyane bengah-benguh, teked jumah besus ngawag, asing paek kapedihan.
3. Turin matur ring bapannya, "Kenken bapa kari sweca yaning tusing, yan sweca lungake durus, Ni Alit Warsiki yan tan sida, titiang masomah ring ipun, titiang pamit pisan ngalas, jengah yan kari iriki.
4. Dadi tanggun kakedekan, nama wirang suka yan titiang ring mati. "Raramannyane sumawur, "Ngudiang bapa twara tresna, uling cenik, bahan ngastiti pang lanus, jani suba kelih kutang, ngiasanin buin abedik.
5. Bapa nyadia twara tulak, twah nyalanin nah nden dabdabang jani, apang nyak masulur patut, jani bapa nu blegbegan, reh kadadak, jani lipurang nden malu, ingkel wong apang masalah, bapa luwas kema ngidih."
6. Puput bawos amunika, tan critanan ring banjar Kasta ne mangkin, ring pasraman ne kawuwus, Sri Mpu Wrediaguna, mangandika, ring Mladprana, Cai mantuk, jeneng sengkala di jumah, yan sing mati ada sakit."
7. I Mladprana matur nyumbah, "Titiang ngiring titiang nunas bekel mulih, arepang titiang ring satru, ring lara miwah ring mrana, samalihnya, mangda titiang panjang tuwuh, mangda tutug antuk titiang, nawur kadi ature riyin."
8. Ida Mpu Wrediaguna, asung lugra Mretyun jaya aji luwih, wimohana mantra putus, ne arepang ring payudan, yan ring lara, Pancabuta Dasabayu, muwah Wijayakusuma, Bayurampag Wisnumurti.
9. Puput ida nganugraha, raris budal Mladprana Jangga Ketaki, ring marga ndatan kawuwus, kacrita tekede jumah, pisagannya, braya wargi teka ngrunyung, cenik kelih tua bajang, bingar suka manakonin.
10. "Gusti kija uli pidan, ne nyen ajak." I Mladprana manyaurin, nuturang tingkahe sampun, turin matempahang awak, "Singgih bapa, beli cai wayan eluh, durasang sweca ring titiang, ngaryanang sapula-pali.
11. Satingkahing pangantenan, apang pragat." Wargine manyawurin, " Eda gusti ngraos liu, nggih titiang ajak makejang, nyadia ngayah, gusti meneng sampun ibuk." Warginnya sami madabdab, ngetang karya tur ngajengin."
12. Magilir i truna bajang, rawuhing tua makemit rahina wengi, kabiaya ortane sampun, Sang Ayu Jangga Ketaki, kakeniang, antuk I Mlradprana iku, I Paseban ia marika, kumah I Mladprana ngungsi.
