124
XXII. PUH GINADA
1. Raris mangojog mulihan, I Mladprana nyapa aris, "Nguda wawu bapa prapta, suwe sampun titiang rawuh, manawike bapa sungkan, acum arig, kadi twara nyak ngajengang."
2. I Paseban nanggal ngucap, "Saja kadi rawos ceninge." Raris midartayang yingkah, krananing mamanggih sungsut, rek aketo krana teka, bapa mai, pangda saking bapa engsap.
3. Teken pragate ne suba, Ni Warsiki cening ngidih, diapin cening ngelah somah, turin ubuh meme guru, yaning saking cening ngulihang, buwung ngidih, saking bapa tan megatang.
4. Nah yan saking cening ngulihang, bapa trima saking hening, tan sebet sedih samatra, bahane ia sakit buduh, krana bapa ngalih bebas, teken cening, apang beneh ban ngenehang."
5. I Mladprana nanggal ngucap, "Titiang naweg matur sisip, sampunang jwa salit arsa, iwang antuk titiang sampun, ngamargiang drowakan manah, ngimur paling, sapatinggal meme bapa.
6. Ne mangkin bapa durusang, sweca ring titiang i miskin, titiang manggeh tinut pisan, ring swecan bapane sampun, yan wantah manggeh suweca, kadi nguni, duke kari bapan titiang.
7. Yadian ipun adin titiang, Ni Warsiki mangkin sakit, indayang titiang mamanah, nunas ica ring Hyang tuduh, bilih wenten sadian titiang, dados becik, seger sakadi ne kuna.
8. Ngiring mangkin bapa budal. "I Paseban tan nulakin, ndatan carita di jalan, satekede jumah ditu, I Paseban nuli ngucap. "Apa alih." Mrika rerehang pasepan.
9. Pere miwah toya anyar, menyan Arab gumpang injin."Pangayahe ngrereh enggal, sampun polih sami rawuh, I Mladprana manguncarang. mantra sandi, Bayu rampag geni ngalayang.
10. Mamugpug ngeseng ngalukat, geseng lebur wisia sami, sahananing guna punah, sampun jani suud buduh, ngelepu kuru sang sungkan, mwah kamantrin, antuk Dasabayu puja.
11. Crita mangkin sampun kenak, Sang Ayu Alit Warsiki, ibu yayah sane ledang, Mladprana nuli matur, "Yaning wantah bapa sweca, Ni Warsiki, banggiang jumah ajak titiang."
12. I Paseban raris ngucap, "Bapa twara magegetin, nah kewala manut tingkah, alihang dewasa malu, bin pidan dewasa minggat, ditu ambil, bapa tuwah misukayang."
