122
21. Sampun puput masangang guna-guna sinami raris budal, pesu munyi sasumbar, "Masa buwung mangungahin, ka banjar kasta bin telun, dening suba ia maciri, tangis duyung upas mandar, maluab-luab ngalebut, makacihna nyida karya, pisan antiang, pawenengan nyani di jani." Mangararis dane budal.
22. Tan kocapan Rudita sampun mulih jani crita, Ni Warsiki crita, engsek bengong mangumikmik, ngapa-apa anak bagus. liyat salap munyi lamis, raramannya ia kagiat, "Nguda ia i cening ngacuh, nyen ja duleg teken titiang, ngawe jengah, dewek twara taen cinging, bin tong taen nekang plamar.
23. Raris ipun bilang pura masasangi nunas ica, nuli ngalih balian, teka balian petang diri, ngalukat raris mapugpug, nebusin tur ngalabanin, buduhe mingkin nyangetang, sami baliane ngalepu, baliane ya sami tulak, raramannya, payu bekut jani sedih, ngapa-apa Mladdprana.
24. Tan kocapan ring Purbawyanjana mangkin kacarita, dane I Rudita, bicak tindakannya tuwi, dening suba maketelun, dadi twara manekanin, pesu mulih dane nguyang, nyagjag pesu manggih suwung, tulak mulih mangguh embang, manah nyane, muwuh inguh munyi paling, mamisuh tong karwan-karwan.
25. Raris mrika ka Purbawyanjana mangkin ngojog mulian, I Paseban nyapa, "Cening kija tembe mai?" I Rudita sawur guyu, "Titiang nyadia twah mariki, kocap pianak bapa sungkan, sami baliane ngalepu, I Mladprana suba ilang, yan twah bapa, lega maang tiang ngidih, titiang sanggup manyegerang.
26. Diapin bapa pacang migegetin mangkin wireh suba, ia ngelah gegelan, janten ipun elas ngalahin, bin katekan sakit buduh, tan wenten nyidang ngubadin, nyen ja nyidang manyegerang, wenang tawirang mariku." I Paseban buli ngucap, "Kadung bapa, suba mlegang uli cenik, tekan ia I Mladprana.
27. Buin tong morta ipun idup mati I Mladprana, malah bapa mlegang, teken cening ane jani, yan ia teka nu idup, adwa bapa teken munyi, bapa suba mawak tuwa, asing ja sedeng mlajah mauk, kema cening jani budal, bapa nabdah, ngalih orta tur minehin, pungkuran malih bawosang."
XXI. PUH PANGKUR
1. I Rudita tan pangucap, raris bangun mangedebros lantas mulih, mecuk alis se beng mrengut, liyat salap tindak ngawag, sing katonang, kaparna inab mamusuh, ane beneh katon nyisang, bahan kasusupan brangti.
