dayang panak somah, apang payu makinyukan.
9. Kasuen-suen jani kawuwus, tetajen di desa, lelakon maaci-aci, wawiden Anak Agung, uran metoh liu-liu, Bagus Diarsa kocapa, di jumah medem malingkuh, bane tuara ngelah gelar, mekabun memati awak.
10. Nyai Sudadnyana wruhing semu, teka patelaan, mamunyi alus nanginin, matangi Gusti Bagus, manguda merem mekabun, tetajen rame di pasar, manguda I Gusti sungsut, yadin biana wenten gelar, boya ngandika ring titiang.
11. Nawi wenten angan seket satus, lewih satak samas, polih titiang ngutik-utik, kamben kalawan kampuh, titiang gadeyanga dumun, data ko sayangang titiang, sok I Gusti apang lanus, liang anak pakayunan, Bagus Diarsa angucap.
12. Nguda keto baan nyai lamun, ne kakung angucap, patut ko ira mamaling, mamegal numpang laku, ngulurin idepe dudu, lamun suba ada jumah, tuara ko ira mangitung, Ni Sudadnyana angucap, inggih mangkin titiang lunga.
13. Ngalih jinah nyandayang kampuh, ne kakung angucap, sok pabesen ira nyai, lampahe apang patut, eda bobab eda jumbuh, ne eluh raris luas, mangaba gagaden kampuh, maaban masanda domas, Bagus Diarsa masiram.
14. Usane masiram nabdab rambut, ngolah jejambulan, masaput ban bonggrek dekil, manyabuk lantas pesu, jinahe sampun kakadut, keris danganane dapdap, mangojog batan tatarub, dening kidik makta gelar, majujuk metoh mangujang.
15. Gangan apisan tong taen ngukup, pipise das onya, pitung atus suba bresih, enu megantulan satus, ka sisi klingas-klingus, dening suba paek sanja , mablanja manumbas sekul, dagange encong nandingang, lantas mara madaaran.
16. Bau mara mangesop ping telu, saget ada teka, gagendong mangidih-idih, matungked pati tuyug, mangundit karoso ibus, anak bungkut suba tua, batis makadadua berung, mecat banyehe manyatcat, bone banges malekag.
46
