ALIH AKSARA GEGURITAN I BAGUS DIARSA
1. I Tanah iseng mangawe kidung, awak lintang belog, jani maambek ririh, paksane weruh ring pupuh, cumangkah mangawi kidung, tunasang ica tembange, silihang ring Istri Tanjung, kalamakan katon bisa, wantah juari buin pongah.
2. Ada tuturan carita ilu, satua pagantian, jani unggahang di gurit, ada jani kawuwus, babotoh maambek rurus, Bagus Diarsa arane, uling cenik mengelilus, tuara surud ring palalian, manuukin legan manah.
3. Mangelah pianak muani aukud, lintang tutubadah, degeng kalih ngidep munyi, tuara kakean laku, liu anak pada lulut, I Wiracita arane, matuuh bau sataun, lintang bakti ring kawitan, manglenganin meme bapa.
4. Nene istri patibrata anulus, nulus kadarman e, ajrih ring sang gurulaki, satata manut kayun, Ni Sudadnyana aran ipun, nene muani masih darma, palapan teken ne luh, sangkan suka makurenan, tuara taen majengihan.
5. Bagus Diarsa jani kawuwus, sing jalan magocek, buka tuara taen sapih, babotoh liu mincul, bane sugih ngelah liu, apanga onya masanda, Bagus Diarsa tuara kengguh, sai gawe kalengitan, sangkan masanggah di empelan.
6. Carik abian isin umah nyamus, maadol masanda, tong dusin jani ngulesin, babotoh pada cumpu, ngigumang madaya biluk, len pacadi babulangan, mangabaang taji elung, nulung siap baan tuba, ada melolongin siap.
7. I Bagus Diarsa tuara kengguh, satata kalegan, kaniskala katchin, anging awake rutrut, karo di awak ngalentuk, tani ngelah paran sira, Ni Sudadnyana kawuwus, tuara ngelah sekel manah, pageh mangisi kadarman.
8. Jani bane liwat-liwat etuh, sara maancuhan, keneng-keneng ngutik-utik, mananggap upah nunun, sageginan anak luh, masih polih asambekan, ngatepukin nasi jukut, maka-
45