57. Kondur lilih balate Tatitangedap, dening winahan wani,
wong Ambaramadya, tan hana ngarasa jeriha, katingalan,
raden Mantri, Sang Megantaka yan balane wus lilih.
58. Raris karep ngamijilang kasaktia, baret agung kaaji, rauh
baret buta, reke tan pantara, kayu batu rubuh sami, bala
Ambara, madya tuara dan kari.
59. Telas ilang kaampehang ban baret, mung kari Raden Mantri
karo lan parekan gelis raris kapanah, ban naga pasa tumuli,
sampun mabasta, naga pasane mangelilit.
60. Raris kadandan rahadian lan parekan, ban I Ujanngritis,
sampun ya ing arsa, nira Sang Megantaka, suka gumuju angeling, Ambara madya, towi tuah tos ing anjing.
61. Anak dana iba mangwales ban ala, ne jani teka rasanin,
kai mangwalesang, alan ibane suba, raris kakoncang tuan
Mantri, jani parekan, di tegale kasiasih.
62. Panes ngentak tur kakiter ban baha, tangan suku matali,
ngentak manyowalak, kebuse tan sapira, sasambate ngereseng ati, sira rahadian, mamitang gelis mati.
63. Duh mas mirah ratu macingak titiang, lemah lemeng matali
kebus mararapuh, buka tan angerasa awak, duh pisan ngemasin mati, ne ajap titiang, mangde gelis kapanggih.
64. Bas tong nyandang titiang manaen sangsara i ratu tuah manik,
lalisan matinggal, ninggalin titiang dewa, pisan masarengan
nguni, tan manggih lara, sangsara sapuniki.
65. Yan peteng ujan angin maka lemah, ndan kawarna malih,
Raden Megantaka, sampun ngeranjing jero desa, kawuwusan
ida sang aji, sampun mangalas, rarud saisining puri.
66. Raden Megantaka ngararis ka taman, kagiat ida ningalin,
yan wenten watangan, marurub sarwa endah, raris ida mangelukarin, raris kacingak, layone raden dewi.
67. Mangandika ring kayun duh kalingane, idewa mangemasin,
patine kadadak, rupa imirah dewa, tan kayun makrama
manik, meling rin titiang, ndugi manyuduk ragi.
108
