Kaca:GEGURITAN MEGANTAKA.pdf/107

Saking Wikisource
Kaca puniki kavalidasi

68. Dong matangi ke iratu susuhunan, sapa titiang mas manik. punapi puaran, titiang yan katinggalan, apan tan lian ne kaesti, sajeroning cita, rasa buka masanding.

69. Sayang kutang layone kadi uripa, ayune nudut ati, masawang padapa, lemete mangelelayak, lumlum gading buka sangling, engken ja ica, batarane mangurip.

70. Yan manyeneng i manik atma juita, apang iratu ugi, mangreh sabuwana, titiang mamanjak pisan, kadihulun kapitui, tan kacarita, nene di taman sari.

IX. PUH PANGKUR

1. Kawarna ane mamarga, raden Mantri mas tilar nagari, pamargine sada andarung, I Dewi Sekarkancana, mangandika beli nunas meriki jujur, ka tegalane nene jimbar, batang titiang wus majurit.

2. Saur kenying raja putra, inggih kangge ugi imirah manik, raris pamargine aseru, rauh ring tegal jimbar, katingalan, tuan Mantri ne kewelas hyun, kalihnya lawan i parekan, sasambate ngeresang ati.

3. Duh ratu pisane suba, sadawege makawon saking gili, kalebu tengahing laut, mangeraris pisan pejah, mangkin sampun waluya ngemasin lampus, titiang manggihin sangsara, sakit san nandang tatali.

4. Lemeng lemah kebus bahang, buka lablab engken ja widine asih, gelis titiang dewa ratu, puputang titiang dewa, mangda gelis titiang kapanggih manutug, ring ida sang sampun lina, rahaden Mantri miragi.

5. Raden mas tilar nagara, kapiwelas, ida miragi tangis, wekasan ngandika alus, duh dewa susuhunan, nunas embusin ana punika ratu, kasangsaran gela-gela, lintang welas titiang ningalin.

6. I Dewa Sekarkancana, sahur kenying titiang lintang sairing, sang dewi ngidepang sampun, mangudep punang genia, api pejah kadi siniraming banyu, malih sang dewi manyipta,

109