2.18. NI DUKUN SAKTI
2.18.1 Teks
Ni Dukun Sakti
Ada reko tuturan satua Ni Dukun Sakti. Kacrita Ida Sang Prabu Daha madue taman pingit gati. Yan ada anak tonden tutug kelih ka tamane ento, pedas lakar sengkala. Nuju purnama- ning kapat, Ida Raden Galuh Daha masucian ka taman sing dadi sampedina antuk biangida, wireh ida tonden tutug duur. Ditu lantas Ida Raden Galuh ampehang pepeteng, ulung di tengah alas Koripane.
Kacrita Mantri Koripan, sedek maboros di alase ento, kairing ban parekanidane, lantas panggihin Ida Raden Galuh. Lemesin ida nagih ajakina ka Koripan, nanging Ida Raden Galuh tusing kayun. Dening Raden Mantri buduh gati teken Raden Galuh tur tusing uningin ia ragane mamingsiki, lantas ambila, jamaha, Ida Raden Galuh. Wireh ida tonden tutug duur, lantas ida kantu. Ida Raden Mantri nyengguhang Ida Raden Galuh seda, wastranidane lantas getep ida anggen ida ngrurubin, lantas kalahina mantuk.
Kacrita jani Men Bekung, nuju ia ngalih saang, tepukina Raden Galuh mara eling teken raga, lantas duduka ajaka mulih anggona pianak, tur sekat ento Men Bekung ia sugih. Kasuen-suen gelising satua, suba kone Raden Galuh duur, taruni eling dogen kone ida teken indike kasangkala antuk Raden Mantri, tan mari pakayunanne pacang ngwalesang nyakitin. Nuju purnamaning ka- pat, palimunan gati kone Ida Raden Galuh lunga masucian sig tetamanan Ida Raden Mantri. Suba suud ida masucian sisan ambuh muah sisigidane kutang ida kayang wadahne ditu, tur pastuna,
“Ih iba ambuh muah sisig, nyanan yen teka I Mantyri Koripan, mai mambuh, yen iba ambuhanga muah sisiganga, apang iba mentik dadi punyan nyuh di tendasne muah dadi padi di bungutne.” Suba kone suud ida mastu keto, lantas ida mantuk kumah Men Bekunge. Suba kone keto, rauh lantas Raden Mantri masucian ka taman kairing ban I Punta, Jrudeh, panggihin ida ambuh teken sisige ento di samping pancorane, lantas ento kone anggon ida sing dadi pamunguina teken I Punta, Jrudeh. Suba suud ida masucian, mrasa prabunidane baat muah lambene genit, lantas ida ngenggalang mantuk. Rauh di puri, nyangetang dogen kone
264
