Pan Tiwas,
Tawisih, awake ne barengan teka ajak ia. Jeg jakan dogen te suba, buin basang seduk tonden ngamah, misi ja cetik dong mati ya, a pang suud kasakitan !" Baase lantas jakana teken Men Tiwas. Maninne semengan buin Raden Galuh Payuk luas ka peken, tur mulih ngaba magenep. Lakar basa, lakar jukut, muah ane lenlenan. Suba kone teked jumah lantas makepotan malebengan di paon wireh payuke jani suba dadi anak cerik luh tur jegeg gati. Men Tiwas ngelah siap aukud, lantas ento juka, abuta bulunne akatih lantas lablaba anggona jukut. Suud magarapan di paon, lantas nyampat makakelud uli jumahan meten nganteg pesu ka natahe . Suba pragat keto, lantas buin menek ka langgatane , buin dadi payuk.
Kacrita lingsir sanja suba lantas teka I Tiwas luh muani uli ngalih gae. Nu joh suba asira jukut be siape, wireh basangne suba layah gati . Lantas ngomong,
"Beh nyen sih ngae jukut be siap, nyursur bonne nganteg mai. Nyai t using ngadek?"
"Yeh sajaan ne." Keto pasaut Men Tiwase .
"Yeh toto, Nanangne, tingalin ja! Dadi kedas gati natahe laad masampat ang, nyen sih olas nyampatang. Yeh ih Pan Tiwas , mai ja delokin , to dadi ada magenep Ci langgatan paone, nyen ya ngejang?" Yeh, ih, ne nasi suba lebeng, ento be gerang mabasa belimbing, dengdeng pada ento di kelatkate, ento jukut be siap mawadak payuk , beneh ya nyursur bonne ngiruk cunguh. Ye cirin kenken ya ne , aah Bapanne?" Masaut Pan Tiwas,
"Cirin kenken nyen orahang. Jabin cirin basang betek. Nah, jalan te suba amah dogen, nyak ya ngranaang mati, dong suud ya kene kasakitan ngalih amah." Ngomong Men Tiwas,
"Ah enden te malu awak ngiwasin payuke, sing nyen palinga teken anake ngaenang dedaaran. Mimi, aget, aget di tongosne, yen ento ilang tekan mati awake sedih ." Suba suud keto lantas ia madaar . Beh nyendi-nyendi kone sopan Pan Tiwas baan tumbenne naar dedaaran jaan-jaan. Sasubanne pada suud madaar lantas mapaomongan ajaka dadua, ngomongang unduke makejang suba pada ada lebeng matah di umahne . Buin mani semenganne, I Tiwas luh muani tusing ngalih gae, nanging ia mengkeb di durin kubunne wireh ia makeneh nawang anake ane ngaba magenepan ka kubunne.
