[᭖᭑ 61 B]
᭖᭑
᭞ᬫᬲ᭄ᬭᬶᬬᭀᬓ᭄ᬢᬶᬬᬶᬗᬾ᭞ᬓᬤᬶᬮᬕᬸᬯᬃᬕ᭄ᬕᬲᬭᬶ᭞ᬫᬸᬜᬶᬦ᭄ᬓᬓᭂᬮᬶᬓ᭄ᬤᬶᬤᬸᬳᬸᬃ᭞ᬓᬤᬶᬦᬸᬦ᭄ᬤᬸᬦ᭄ᬓᬬᬸᬦ᭄ᬭᬶᬦ᭄ᬤᬸ᭞ᬓᭀᬳᭀᬲᬦ᭄ᬢᭀᬬᬤᬶᬢᬸᬓᬤ᭄᭞ᬧᭂᬢᭂᬗᬜ᭄ᬚᬯᬦᬾᬳᬸᬬᬸᬢ᭄᭞ᬤᬶᬭᬳᬩᬾᬬᬫᬘ
ᬡ᭄ᬥ᭞ᬫᬸᬜᬶᬦ᭄ᬓᬸᬓᬸᬃᬲᬮᬶᬂᬢᬶᬫ᭄ᬩᬮ᭄᭟ᬫᬓᬲᬫᬶᬳᬶᬘᬮ᭄ᬫᬸᬗ᭄ᬕ᭄ᬯᬶᬂᬓᬬᬸᬦ᭄᭞ᬫᬕᬦ᭄ᬢᬶᬓᬬᬸᬦᬾ᭞ᬳᬾᬮᬶᬂᬭᬶᬂᬳᬶᬲᬾᬦ᭄ᬤ᭄ᬭᬢᬭᬶ᭞ᬓᬮᬶᬄᬲᬹᬃᬬ᭄ᬬᬓᬾᬫᬓᬸᬯᬸᬕ᭄᭞ᬓᬭᭀᬜ᭄ᬘᭀᬂᬫᬸᬜᬶᬗᬮᬸᬮᬸ᭞ᬢᬭᬶᬮᬾᬕᭀᬂ
ᬭᬶᬂᬯᬦ᭄ᬢᬶᬮᬦ᭄᭞ᬳᬶᬦ᭄ᬤᬄᬦᬵᬗ᭄ᬳᬶᬂᬕᭂᬮᬶᬲ᭄ᬢᭂᬫᬸ᭞ᬤᬾᬦᬶᬂᬧᬕᬯᬾᬦ᭄ᬫᬵᬦᬸᬱ᭞ᬦᬾᬦ᭄ᬢᭂᬦ᭄ᬮᬗ᭄ᬕᭂᬂᬓᬫ᭄ᬮᬳᬦ᭄ᬜ᭟ᬲᬸᬚᬢᬶᬦ᭄ᬦᬾᬫᬓᭂᬚᬂᬬᬮᬸᬳᬸᬂ᭞ᬲᬭᬧᬗᬃᬱᬦᬾ᭞ᬕᬸᬦᬸᬂᬳᭂᬚᭀᬄᬓᬢᭀᬦ᭄ᬭᬯᬶᬢ᭄᭞ᬳ᭠
ᬮᬶᬄᬲᬭᬢᬂᬬᬓᭂᬧᬸᬂ᭞ᬢᭂᬓᭂᬤ᭄ᬤᬶᬢᭂᬧᬸᬓ᭄ᬧᬗ᭄ᬚᬓᬸᬂ᭞ᬓᬬᬸᬦ᭄ᬫᬮᬶᬄᬫᬮᬶᬧᭂᬢᬦ᭄᭞ᬲᬕᬾᬢ᭄ᬳᬦᬓ᭄ᬳᬮᬶᬢ᭄ᬭᬯᬸᬄ᭞ᬲᬳᬫᬗᬢᬹᬭᬂᬲᬸᬭᬢ᭄᭞ᬤᬬᬸᬭᬹᬓ᭄ᬫᬶᬦᬾᬦᬶᬢᬶᬧᬂ᭟᭚᭜᭚ᬧᬸᬧᬸᬄᬤᬸᬃᬫ᭄ᬫ᭚᭜᭚
[᭖᭒ 62 A]
ᬮᬗ᭄ᬓᬸᬂᬲᭂᬧᬶᬉᬫᬄᬢᬶᬢᬶᬬᬂᬬᬦ᭄ᬭᬱᬬᬂ᭞ᬲᬸᬓᬢ᭄ᬳᬤᬶᬫᬗᬮᬳᬶᬦ᭄᭞ᬜᬦ᭄ᬥᬂᬳ᭄ᬬᬂᬦᬶᬂᬚᬕᬢ᭄᭞ᬲᬮᬫ᭄ᬧᬳᬾᬫᬮᬜ᭄ᬘᬭᬦ᭄᭞ᬕᭂᬦᬳᬾᬫᬘᬬᬲᬫᬶ᭞ᬳᭂᬗ᭄ᬓᬾᬦ᭄ᬫᬵᬯᬶᬦᬦ᭄᭞ᬲᬬᬦ᭄ᬫᭀᬯᬫᬜᬸ
ᬦ᭄ᬤᬭᬶᬦ᭄᭟ᬳᬤᬶᬦ᭄ᬢᬶᬢᬶᬬᬂᬥᬃᬫ᭄ᬫᬬᬰᬲᬵᬫ᭄ᬧᬸᬦ᭄ᬩᬸᬤᬮ᭄᭞ᬓᬤᬾᬦ᭄ᬧᬲᬃᬓᭂᬫ᭄ᬩᬮᬶ᭞ᬧᬸᬦᬶᬓᬗᬯᬶᬦᬂ᭞ᬤᬾᬦᬶᬂᬳᬤᬶᬲᬵᬫ᭄ᬧᬸᬦ᭄ᬩᬸᬤᬮ᭄᭞ᬭᬯᬸᬳᬶᬂᬢᬶᬢᬶᬬᬂᬢᬦ᭄ᬩᭂᬘᬶᬓ᭄᭞ᬫᬶᬦᬩ᭄ᬧᬘᬂᬳᬾᬗ᭄ᬕᬮ᭄᭞ᬯᬾᬦ᭄ᬢᭂ
ᬦ᭄ᬧᬘᬂᬧᬋᬓ᭄ᬫᬭᬶᬓᬶ᭟ᬲᬢ᭄ᬳᬸᬢᬸᬲᬦ᭄ᬲᬓᬶᬂᬓᬸᬮᬯᬃᬕ᭄ᬕᬦ᭄ᬢᬶᬢᬶᬬᬂ᭞ᬕᬸᬫᬦ᭄ᬢᬶᬦᬸᬦᬲ᭄ᬳᬤᬶ᭞ᬳᬗ᭄ᬕᬾᬦ᭄ᬢᬶᬢᬶᬬᬂᬳᬶᬧᬄ᭞ᬫ᭄ᬭᬩᬶᬭᬶᬂᬥᬃᬫᬬᬰ᭞ᬗᬦᬹᬢᬂᬧᬫᬃᬕ᭄ᬕᬶᬭᬶᬳᬶᬦ᭄᭞ᬬᬦ᭄ᬢᬦ᭄ᬳᬮᬗᬦ᭄᭞ᬲᬫᭂᬢᭀᬦ᭄ᬲᬫᬶ
ᬳᬶᬭᬶᬓᬶ᭟ᬦᬾᬦ᭄ᬢᭂᬦ᭄ᬲᬶᬯᭀᬲ᭄ᬳᬲᬶᬓᬶᬦᬾᬓᬓᭀᬩᭂᬢᬂ᭞ᬬᬦ᭄ᬳᬤᬶᬦᬾᬦ᭄ᬢᭂᬦ᭄ᬭᬤᬶᬦ᭄᭞ᬓᬬᬸᬦᬾᬫᬧᬓ᭄ᬱ᭞ᬲᬶᬦᬄᬧᬘᬂᬧᬸᬗ᭄ᬓᬸᬭᬦ᭄᭞ᬧᭂᬓᬯᬶᬦᬦ᭄ᬫᬮᬂᬭᬸᬕᬶ᭞ᬳᬤᬶᬫᬦᬸᬢᬸᬭᬂ᭞ᬍᬕᬦᬾᬓᬤᬸᬂᬫᬳᬸᬫ᭄ᬩᬶ᭟
Kaca:Bali-lontar-geguritan-anggreni-300ppi.pdf/62
Kaca puniki sampun kauji-wacén
