[᭖᭐ 60 B]
᭖᭐
ᬦ᭄ᬳᬗ᭄ᬭᬾᬡᬶᬦᬾᬤᬸᬫᬸᬦ᭄᭞ᬲᬵᬫ᭄ᬧᬸᬦ᭄ᬳᬓᬾᬄᬲᬦᬾᬲᬸᬭᬸᬤ᭄᭞ᬤᬾᬦᬶᬂᬤᬦᬾᬲᬵᬫ᭄ᬧᬶᬦ᭄ᬯᬶᬓᬦ᭄᭞ᬓᬦ᭄ᬢᬸᬦ᭄ᬳᬶᬤᬸᬧ᭄ᬤᬶᬓᬫ᭄ᬧᬸᬂ᭞ᬩᬦ᭄ᬤᬶᬗᬂᬳᬶᬤᬸᬧ᭄ᬤᬶᬓᭀᬣ᭞ᬲᬵᬫ᭄ᬧᬸᬦ᭄ᬤᬦᬾᬫᬦ᭄ᬭᬱᬬᬂ᭟ᬧᬢᬸᬢᬹᬭᬾ᭠
ᬤᬬᬸᬭᬹᬓ᭄ᬫᬶᬤᬸᬫᬸᬦ᭄᭞ᬜᬸᬧ᭄ᬭᬶᬂᬓᬬᬸᬦᬾᬤᬾᬦᬶᬂᬧᬵᬢᬹᬢ᭄ᬬᬕᬸᬕᭀᬦᬶᬦ᭄᭞ᬳᬯᬦᬦ᭄ᬤᬦᬾᬢᬦ᭄ᬢᬦ᭄ᬤ᭄ᬭᬸᬄ᭞ᬮᬶᬬᬸᬳᬦᬓᬾᬢᬦ᭄ᬫᬵᬦᬹᬢ᭄᭞ᬩᭂᬮᬲ᭄ᬲᬸᬯᬸᬤ᭄ᬫᬓᬸᬋᬦᬦ᭄᭞ᬢᬦ᭄ᬲᬶᬬᭀᬲ᭄ᬩᬢᭂᬓ᭄ᬩᬵᬦ᭄ᬮᬘᬸᬃ᭞
ᬓᬦ᭄ᬢᭀᬂᬓᭀᬲᭀᬂᬢᬦ᭄ᬧᬚᬶᬦᬄ᭞ᬚᭂᬗᬸᬃᬦᬾᬳᭂᬮᬸᬄᬗᬫ᭄ᬩ᭄ᬭᬾᬲᬂ᭟ᬬᬾᬦᬶᬂᬚᬶᬦᬄᬲᬵᬫ᭄ᬧᬸᬦ᭄ᬗᭂᬮᬄᬮᬶᬬᬸ᭞ᬕᬫ᭄ᬧᬂᬧᬶᬢᬸᬗᬦᬾ᭞ᬦᬾᬩᬳᬢ᭄ᬜᬶᬤ᭄ᬥᬬᬂᬳᬶᬬᬶᬂ᭞ᬕᭂᬤᭂᬕ᭄ᬩᬲᬂᬤᬤᬶᬮᬶᬧᬹᬃ᭞ᬫᬗ᭄ᬓᬶᬜ᭄ᬘᬭᬶᬢᬬᬂᬤᬸᬫᬸ
ᬦ᭄᭞ᬳᬗ᭄ᬭᬾᬡᬶᬲᭂᬥᭂᬓ᭄ᬫᬦᭂᬕᬓ᭄᭞ᬗᬮᬶᬗ᭄ᬲᬶᬭᬂᬲᭂᬥᭂᬓ᭄ᬲᬸᬯᬸᬂ᭞ᬩᭂᬗᭀᬂᬳᬶᬗᭂᬢ᭄ᬤᬶᬧᬗᬶᬧ᭄ᬬᬦ᭄᭞ᬩᭂᬮᬶᬳᬃᬣᬢ᭄ᬯᬄᬳᬶᬗᭂᬢᬂ᭟ᬧᬚᬮᬦᬾᬩᬦ᭄ᬩᬦ᭄ᬓᬮᬶᬄᬗᬸᬦ᭄ᬢᬸᬓ᭄᭞ᬲᬸᬭᬫ᭄ᬬᬫᭀᬯᬦᬾ᭞ᬭᬕᬩᬋᬂᬦᬦ᭄ᬤᬂ
[᭖᭑ 61 A]
ᬲᬶᬦᬄᬫ᭄ᬮᬭᬢ᭄ᬲᬗ᭄ᬲᬭᬉᬩᬸᬄ᭞ᬢᭀᬗᬤᬢᭀᬗᭀᬲ᭄ᬩᭂᬃᬕᬦ᭄ᬢᬶ᭞ᬢᭀᬗᬤᬢᭀᬗᭀᬲ᭄ᬫᭂᬜ᭄ᬚᭂᬓᬦ᭄᭞ᬬᬦ᭄ᬤᬦᬾᬳᬾᬮᬶᬂᬭᬶᬂᬓᬬᬸᬦ᭄᭞ᬳᬗ᭄ᬓ᭄ᬬᬦᬾᬓᭀᬳᭀᬲ᭄ᬢᬹᬃᬧᬜ᭄ᬚᬂ᭞ᬢᬩ᭄ᬧᬾᬡ᭄ᬥᬄᬳᬶ᭠
ᬤᬕᬶᬂᬮᬭᬢ᭄᭟ᬳᬬᬸᬳᬗ᭄ᬭᬾᬡᬶᬦᬗᬶᬲ᭄ᬬᬩᭂᬓᬸᬢ᭄᭞ᬩᬢᭂᬓ᭄ᬧᬶᬢᬺᬱ᭄ᬡᬦᬾ᭞ᬲᭂᬤᭂᬂᬉᬮ᭠ᬗᬸᬦᬾᬫᭂᬦ᭄ᬢᬶᬓ᭄᭞ᬳᬚᬳᬦ᭄ᬲᬕᬾᬢ᭄ᬮᬸᬦ᭄ᬢᬸᬃ᭞ᬫᬕᭂᬦ᭄ᬢᭀᬲ᭄ᬯᬃᬡ᭄ᬦᬦᬾᬭᬯᬸᬄ᭞ᬜᬲᬦ᭄ᬲᬸᬯᬾᬜᬲᬦ᭄ᬢᬶ
ᬗ᭄ᬕᬃ᭞ᬓᬳᬶᬦ᭄ᬤᬳᬜ᭄ᬚᬫᬦ᭄ᬩᬭᬸ᭞ᬳᬶᬤᬸᬧᬾᬘᬭᬤᬶᬓᭀᬣ᭞ᬤᬬᬸᬭᬹᬓ᭄ᬫᬶᬬᬫᬭᬯᬢ᭄᭟ᬥᬃᬫ᭄ᬫᬬᬰᬫᬦᬶᬲ᭄ᬍᬫᬄᬍᬫ᭄ᬩᬸᬢ᭄᭞ᬕᬦ᭄ᬢᭂᬂᬬᬕᬬᬦᬾ᭞ᬳᬚᬳᬦ᭄ᬲᬕᬾᬢᬦ᭄ᬳᬾᬮᬶᬂ᭞ᬕᬤᬶᬲ᭄ᬓᭀ
ᬣᬢᬗ᭄ᬓᬲ᭄ᬳᬬᬸ᭞ᬧᬸᬧᬸᬃᬤᬶᬧᬶᬧᬶᬦᬾᬲᬭᬸ᭞ᬩᬶᬩᬶᬄᬩᬭᬓ᭄ᬭᬫ᭄ᬩᬸᬢ᭄ᬲᬲᬓ᭄᭞ᬭᭀᬓ᭄ᬲᭂᬧᬦ᭄ᬩᬚᬸᬓᬾᬮᬸᬯᬸᬂ᭞ᬲᬕᬾᬢ᭄ᬳᬾᬮᬶᬂᬩᬸᬗ᭄ᬓᬸᬢ᭄ᬩᭂᬃᬲᬶᬬᬦ᭄᭞ᬘᬬᬦᬾᬗᭂᬡ᭄ᬥᬶᬄᬫᬦ᭄ᬭᬜᬄ᭟ᬓᬵᬮᬤᬶᬢᬸᬳᬗᬶᬦ᭄ᬳᬭᬶᬲ᭄ᬭᬯᬸᬄ
Kaca:Bali-lontar-geguritan-anggreni-300ppi.pdf/61
Kaca puniki sampun kauji-wacén
