Kembang Rampe Kasusastraan Bali Purwa Wewidangan I Buku II/Geguritan Kanda Empat

by I Gusti Ngurah Bagus miwah I Ketut Ginarsa

[ 36 ]

1.12 GEGURITAN KANDA EMPAT

Puh Sinom

1. Tembang sinon kakawian, pangaksama maring kawi, duh Ratu Sang Hyang Suksema, agung sisip sinampuri, titiang kolug ngawi-awi, mangrencana ngawe kidung, ulate makuma wikan, lintang langgia ngawi-awi, nene mungguh, kandane dumadi jadma.
2. Duk sang bapa kari bajang, duk kari anom sang bibi, sang bapa tumbuh Hyang Smara, sang bibi tumbuh Hyang Smari, mijil saking sunia ati, metu ikang smara lulut, ene me tu saking bapa, smaraguna araneki, ne ring ibu, smara sidi ngarania.
3. Sami metu maring tingal, nerus maring sabda sami, Sang Hyang Remes arania, sabdania asabdan bibi, sampun pada manyukanin, matemuang smara lulut, bubur rumaket ngarania, pulung kamandane sami, meseh adan, tetiga jati arania.
4. Ada nyamannyane patpat, mijil saking yayah bibi, dadi Dewa kalaanta, dadi atma mangraganin, dadi tamba dadi gering, dadi leak balian putus, dadi papa dadi swarga, dadi pati dadi urip, tangi turu, saking irika pametunia.
5. Keto kocap katuturan, apang bisa mamidenin, ne madan kala muang Dewa, miwah atma mangraganin, pada ya saling unyain, Dewa kala atma iku, papa nerakane kocap, miwah suargane lewih, masih enu, tongosnyane saling kalahang.
6. Sami pada saih empat, Dewa kala atma iki, sangkan madan kanda empat, ane ajak bareng dumadi, yeh nyome miwah getih, ari-ari miwah luu, ento dadi Dewa Kala, dadi atma mangraganin, ala ayu, papa swarga saking irika.
7. Sangkan anake periksa, ngamong dewek sai-sai, ngagem pabresihan reko, brata yasa lan semadi, masepuh mapangening-ening, makala hias mawinten agung, anggen mresihin kala dewa, kala atma pada bresih, brata yoga, bresihin Sang Hyang Suksma.

[ 37 ]

8. Makalah dengen makalah ias, anggen pangedeng ring bumi, tulen mangawe keneh gaok, awake tulusan dekil, dewa kalane ngawakin, payune masih letuh, kewala ngedenang utang, lamun tuara sira uning, tuara buung, anggen makendelin awak.
9. Ketil ngalih nene sukla, ane kedas ane ening, di tengah setrane nongos, raksasa liu mangrik, katah kawahe ngilehin, wenten kawah lepit siu, sangkan tusing anak nawang, sakatah jadmane urip, tuara nepuk, kewala nawang tuturan.
10. Sangkan ada brata tapa, ento ngawe ati ening, sukla rasa swarga reko, ring tengah putihing ati, ditu ada toya ening, tirta pawitrane nulus, anging arang anak nawang, mangalih madasar pati, dadi tepuk, atmane yogia manawang.