Kembang Rampe Kasusastraan Bali Purwa Wewidangan I Buku II/Geguritan I Dora teken I Waya

Saking Wikisource
[ 38 ]

1.13 GEGURITAN I DORA TEKEN I WAYA

Puh Sinom

  1. Ada anak maswitraan, madan I Dora adiri, I Waya ane ukudan, bareng-bareng yen malali, maring mantra negari, ngalilaang keneh inguh, peteng lemah mapiguman, ngitungang lakar kabukti, suba igum, dipolihe maepah dua.
  2. Kocap di tengahing marga, polih nuduk mas ngulintik, katahnyane kalih tepak, I Waya makruna aris, "Dora jalan ja ne jani, mase ane baan nuduk, bagi dua pada padaang, laut jalan aba mulih, apang puput, tusing ada buin kenehang".
  3. I Dora sumaur banggras, "Tusing sedeng jani bagi, wireh dinannyane bodo, palannya makrana miskin, singidang jua suba dini, apang trada anak tau, sai jemak anyandang an, yaning suba telah sami, nuju suung, jalan jemak padaduanan."
  4. Mase tumuli kengkebang, kapendem soring waringin, raris sami pada budal, kumahnya pada mandiri, kocapan sampun lami, rauh I Dora mangapus, mang ambil mase totonan, kabakta jumahnya mangkin, timpalipun, boya pisan pitauna.
  5. Sasubannya limang dina, I Dora mabikas lengit, kocapan teka I Waya, kumah I Dorane mangkin, mapajar ipun raris, "Jalan kuda jani laut, ka tongos mase i pidan, wireh mas icange sami, tan pagantul, apang ada anggon benjang."
  6. Ceritaang pada majalan, ngojog tongos mase riin, kapanggih masnyane telas, I Waya nuli macegik, "Tuara ada anak uning, jawining cai mamangguh, sinah cai ne manyuang, ngengkebang emase sami, keto tuhu, wireh lenan trada nawang.
  7. I Waya laut kadandan, kajak manangkil ka puri, manunas pamatut kreta, kalih mangda kapasisip, I Waya
[ 39 ]
  1. maatur sisip, nenten pisan ipun ngaku, mang ambil mase punika, I Dora ia mikukuhin, kalih ipun, aturnyane ring Sang Kreta.
  1. "Inggih Ratu Ida Kreta, titiang wantah sareng kalih, ngeniang mase punika, ipun kalih titiang ugi, kaengkebang ring Wanadri, sesoring tarune agung, irika tanem titiang, dagingnya sekadi mangkin, wantah ipun, mamaling mase sinamian."
  2. Pangandikan Ida Kreta, "Anake nyaksinin cai, nyihnayang I Waya manyuang, aturnya I Dora aris, "Boya wenten jadma uning, jawining i punyan kayu, pinaka susaksin titiang", sang Kreta kagiat miarsi, raris muus,"Buin mani suba pragatang".
  3. I Dora kalih I Waya, pada ia majalan mulih, napak I Dorane jumah, nutur ring bapanne gelis, parindiknyane sami, tangkil ring Ida Sang Wiku, nguningaang pawicara, arepnyane ring i maling, adanipun, I Waya saking Kawanan.
  4. "Cendek titiang nguningaang, punyan kayu makasaksi, kadi mangkin mangda Bapa, ka gook kayu ngaranjing, manawita katakenin, antuk Ida Sang Wiku, keni Bapa nguningaang, I Waya sane mamaling, keto antuk, mangda keni sapunika".
  5. Masaut alon bapannya, "Yening keto saja cening, tusing nemu karahayuan, anake madaya lengit, nganggon upayane sandi, laksanane tan rahayu, pedas alane temokang, depang anggon Dewa Widi, benjang pungkur, ala nrakane tamana".
  6. Ngucap pianaknyane banggras, "Da Bapa liunan munyi, wireh tuyuhe ajahan, pikolihnyane adigdig", kacrita Bapanne jani, suba reke kaselimur, tumuli ia katuutang, pamunyin panakne brangti, apan langkung, tresnannyane teken pianak.
  7. Benjang wau dauh pisan, bapannyane nuli ngranjing, kasong kayune totonan, kocap Ida Kreta jani, rauh
[ 40 ]
  1. pacang manetesin, ka punyan kayu puniku, ngandika Ida Sang Kreta, tekening kayu waringin, "Cai kayu, mase dini nyen ke manyuang".
  1. Masauran I Pan Dora, "Mase punika kaambil, antuknya ipun I Waya, Ida Sang Kreta pramangkin, kamemegan Ida miarsi, aturne i punyan kayu, raris kapangandikaang, iringan ngendihang api, mangda murub, andusnyane malipugan
  2. Sampun puput mangendihang, antuknya katah mangranjing, ka tengah gooking wreksa, Pan Dora kocapan jani, gelar-gelur jerat-jerit, dening kebuse kalangkung, paling di tengah bekbekan, tumuli ipun umijil, uli ditu, di gooknyane i wreksa.
  3. Ida Sang Kreta nakonang, awanannya kadi mangkin, tingkahe kadi wong edan, Pan Dora nguningang indik, pratingkah pianake sami, "Gumana manguluk-uluk, kaulan Ratu I Waya", wus matur Pan Dora mati, mas puniku, kapicaang ring I Waya.
  4. Punika Dewa elingang, sawireh I Dora drenggi, purun mamaksa rerama, sinah ipun mamanggihin, duhkitaning ati wiakti, katinggal bapane lampus, malih ipun kasisipang, baan salahnya kekalih, nguluk-uluk, nganggon laksana durjana.