Kembang Rampe Kasusastraan Bali Purwa Wewidangan I Buku II/Geguritan Curik (Botoh Lara)

by I Gusti Ngurah Bagus miwah I Ketut Ginarsa

[ 3 ]

1.2 GEGURITAN CURIK (BOTOH LARA)

Puh Adri

1. Agung sampuran i belog maabet wruh, twara nawang wirang, ngawe kidung tembang Adri, sastra nista tan paguru, salah pasang akeh bandung, jajarane matriyugan, rebah sasar twara mupuh, tedung taleng cecek surang, suku ulu katah kecag.
2. Sapasira ida dane ipun, anging aksamayang, yaning kayun mambaosin, tegepang antuk wuwus, yaning lintang kirangin antuk, kang manyurat liat abawak, maduluran sampun pikun, bongga bangga tan paturah, twara ngedalemang awak.
3. Kademenan budine ngulah kajum, manuptupang orta, diapin saja kalawan tusing, dening twara jati weruh, kewala pantes yen rungu, nyaka ya nyaka twara, dadi anggon satwa nganggur, ri kalaning matebengan, pesu tutur satua bobab.
4. Suba pedas tuture liunan mauk, satua di patuakan, saget puyung saget misi, apan munyi patikacuh, tani kangin tani kauh, dening satua duluran, beneh salah liunan saru, ne ayu teken ne ala, ne saja kalawan twara.
5. Ane tiwas kaden makejang mauk, suba janten ngenah, ne sugih sengguhang jati, dening suba sekala wibuh, mas slaka arta liu, muang busana twara kirang, kalih panganggene murub, tegal abyan carik katah, umah katah pasewaan.
6. Suba keto masih bisa mauk, mobabin i tiwas, sangkan ketil ban ngingetang, ane tiwas ada patut, twara bisa cidra wuwus, astiti kirti pageh ujar, belog polos tutut pupuk, twara bisa masilih ujar, twara linyok ring ubaya.
7. Jani i sugih ngaku darma patut, magehang munyin sastra, kretagama sloka sruti, salwiring tutur kacakup, tapa brata sampun puput, nanging pageh darma baka, ngulah pangan apang liu, i tiwas belog clulukan, twara nawang

</noinclude> [ 4 ]

1. pacang upaya.

8. Peteng lemah paling patikepug, twara nawang emar, ngambil karyannyane i sugih, tuara ngitungang tuyuh, ngambil karya siang dalu, kadi potet prabangsahe, suba nyongkok katunden bangun, suba bangun katunden negak, suba negak tunden majalan.
9. Joh paek lampahe twara da kengguh, ngulahang asaksanaan, kamben sabuk mwang kalambi, suba maklo karasa tuyuh, tuyuh gede mlapu-lapu, bakat amah abasangan, panak somah jumah makungkung, dadi celed twah apisan, i sugih raris ngitungang.
10. Sandang pangan sane suba langkung, pada munggah masurat, dadi utang kumpul sami, keto darman cangake puput, sangkan emeng baan nyengguh, sengguh patut ia corah, sengguh corah ia patut, makadi I Botoh Lara, ngalih karya stata corah.
11. Maumah ia di Banjar tur, kocap desannyane, mawasta di Baturinggit, lampah twara nuut sikut, tan sah ngarepang dudu, bencana juriring timpal, biseka bancuri mandung, ngapu mobab cukat mirat, twara ngitung manah anak.
12. Twara bisa ngalih karya patut, dalu miwah lemah, mangrimpyang dayane dekil, sapolahe mungpang laku, pamadat bebotoh ngiyung, matwakan seringan punyah, pesu omongnyane ngacuh, pepes ngamah twara mayah, i dagang mabasa nyalah.
13. Ban tingkahe krurakara mandung, matwikara wikan, twara kuang-kuang munyi, milih menang yen mapadu, wikarane cara malu, jaksa kanca ngungsi pakolihan, Tantri kamandakane katurut, I Wulacit I Surada, ane patut kakalahang.
14. I Cembilan ya mokoh gede lemuh, patute makeplak, I Mumut bobab payah arig, yen kalahang ia I Mumut, ia berag pengit etuh, dijaha pacang ulahang, mangraosin maupah puyung, dadi i bojog kailonan, I Petu ia kakalahang.

[ 5 ]

15. Dagang tuak mwah i dagang sekul, emeng mangwilangang, kenehe pacang manggih, lasya yan ngendepang sampun, I Botoh Lara kawuwus, sumangkin mungal tangkepe betek, ngawe tandang krura nanggur, gendang-gending di margane, mirib twara kuangan apa.