ALPAKA
Dong, wanen pesan
Manusane teken rerama
Cara tusing kapiutangan
Upama bani teken langit
Makruna nyeroscos
Tusing nawang panglokika
Mawit basang bedos
Ane keto madan mahardika?
Inguh bayune madingehang
Krunane ngaliwat bates
Pakertin rerama kanistaang
Pesu mulih satata ngambres
Tata titine kapurug
Desa drestane kakutang
Desa mawa carane urug
alpaka, ... tusing sandang-sandang.
(Denpasar, 16-7-2002)
NYICING SINGAL
Uling Cenik kaupapira
Nganti kelih dadi jadma
Suba ngelah kawisayan
Namtamin kawigunan.
Suba ngelah pangupajiwa
Enu masih nyakitin rerama
Maan aketeng nagih dadua
Teka lalima nagih adasa
Keneh bas kaulurin
Indriane katuukin
Budi satwam kakelidin
Momo drowakene kaopenin
Buin pidan lakar masalin
Anak tua wantah patut ajinin
Peragayan gumi lan langit
Eda nyicing singal tur ngalengit
(Denpasar, 18-7-2002)
27
