KERIKAN GANGSA
Nyen tusing nawang
sajroning pangiwa
teluh trangjana
parilaksanane dudu
nirdon mapalajelek
nganggon racun wisia
dui, bok, tulang
warangan, medang tzing
kerikan gangsa
ento makejang
kaanggon serana
manadi racun
ngawisianin
makrana nandang
sakit berag-arig
tibanan mapwara
mati, ...
keto masih
cara gumine jani
liu jadmane mawak
racun ngawisianin
mapi sadu dueg
sakewala racun
ngae brayane
masiyat brangti
saling sikut
mamati-mati
tan mangitung kadang
ento wit ngugu
munyin anake
waluya kerikan gangsa
yan jani madan
provokator.
(Denpasar, 18-5-2001)
KETOG SEMPRONG
Rikala jagate linuh
rahina utawi wengi
asing magantung ayun-ayun
asing matanjeb maoyagan
jadmane sami
lanang wadon
alit-anom-lingsir
sedeng sirep, magarapan
pada age medal
ka natahe
ngarereh genah
sane lasia
ajrih katiben
raruntuhan
marantaban
saha ngucap-ucap
"idup" - "idup"- "idup "
maduluran
bayu ngetor
tangkah nerugtug
angkihan ngangsur
umahe sami su-wung
saisinnyane
kaketogang
ngelidang urip
ka genahe linggah
manut sasenggak
ketog semprong.
(Denpasar, 19-5-2002)
20
