GAGONJAKAN
Anejani
ajak makejang
pada mastikayang
yan basa baline
lakar ilang
kaengsapin
di kutaraja
di desa banua
paribasane madukan
tusing manut
sor singgih
tata titi
makejang lalingsen
tusing ada seken
maada tuara
makejang cara
nyuh nguda
maduegin.
luh-luhe
binal macukur
ngetep bok
teruna-terunane
mabok salahan
ada makebah
mapusung sangkur
truna-trunine
sai-sai suba
makunyit di alas
matemu ngulurin
demen ati
wit mawayang gadang
tresna pada asih.
(Denpasar, 12-12-2001)
PARADARA
Cirin gumi
suba wayah
di desa-desa
teked ka kota
makejang madamar
listrik ngentar
peteng lemahe
patuh pikanten
i buta mapuara kedat
makejang mamurug
uger-uger wet
sila sasanane
sima tatakrama
tan pasantulan
egar manah makejang
ngulurin dasendriya
di pabyanan
di padunungan
desa pakraman
mamitra ngalang
nyolong samara
ngelah babinjat
astra
mamadu luh muani
panak rerama
matwa mantu
kaka adi
makejang
mameteng pitu.
(Denpasar, 12-12-2001)
15
