Sedek odalane di pura Munduk Danu ditu buin I Laba macepuk ngajak I Mirah. Suba makepoan anak mamarek ditu. Gonge ngaredeg tangkahne I Laba masi ngaredeg ngengkebang itungan ane sing dadi tawang nyen. Tongos purane luung ngungkulin danu. Di jaba linggah nyandang tongos anak mamarek duang tali lebih. Ada punyan baingin, kopi, juuk, bunga pacebuah-buah, ah cutetne tongose ento asri tur ngisengin. "Rah, tingalin ja kedis belibis ento. Ulesne girang pesah ia ditu. Makeneh kayeh nyilem, too too makeber jeg sing ada nglikadin.
Kenken ya naunne o Rah o. Yen beli numadi buin cepok edot dadi belibis: ngulahang nguda ngenken sing ada nyampedin, sing ada nyalahang."
"Apang cara Prabu Aji Angling Darma?." I Mirah kenyem nutugang ngomong kene. “Sri Bhagawan Kresna ngandika cara kene ken Sang Partha: “yen anak nyampingang edote uli kenehne tur yen prasida ngrasaang lega ulian kapatutane sajati, ento [...] dan wicaksana; engsap beli."
"Sing ja engsap."
"Men."
“Beli masi patut. Rah, beli masi patut tur lega."
"Tusing wicaksana."
"Nguda keto?"
