34 | | Wayan Sadha
lacuré sasukat makurenan ngajak Nang Locong tuara taén enjuhina pipis nyang abéngol ané kebés. Kuala Mén Locong mula anak luh luwih, diapinké setata nepukin pakéweh buka kéto, ia tetep ngalih pangupajiwa apang tusing pianaké kanti lempuran. Mén Locong anak baksa ngalih gaé, das lemahé berangkat ka peken madagang umbi-umbian baana nempil di abian petaniné. Ritatkala rarainan kajeng kliwon, purnama, tilem ia madagang canang, madagang jajaitan marupa cepér, wewakulan lan porosan, tubungan. Teka uli madagang teked jumah ngalih dagdag baanga céléng. Anak ya ngubuh céléng pat-pat anggona cadangan Galungan Kuningan. Pikolih dagangané totonan cageranga anggona ngamertanin pianak-pianakné. Yén pamelin céléngé anggona nagenin panelah nuju odalan di sanggahné, sawiréh ia nampi tatamian sanggah gedeé. Nang Locong suba kadung kaliputan mamotoh kanti engsap teken deweke numbuhang pianak, kéto masi ngelah kurenan tuara taén baanga pangupajiwa. Mén Locong pakewehné sayan nyusup ka tengahing garba, kuala Nang Locong nyangsan linglung tuara ja jengah tekén déwék, bulan-bulanan ia tusing taén mulih ngaba pipis pamenang, jag pragat kalah matajén, jawat maplalian ané Jénan. Ento makada ia engsek mapan gelar utawi kamulané setata telas kalah matoh, terpaksa Nang Locong dadi maling, apang ada anggona matoh di tajen. Ane kereng malinga saananin asil petani abian utawi asil cariké. Petengé ia mamaling keséla jawat umbi ané lénan, bin maninné adepa sig saudagaré, pameliné telah di tajén. Dikénkéné yén ia mamaling nyuh, jag nyidayang ia néngténg nyuh aijeng ngaba tuun, awinan tengténga apang tusing kadingehan glebugan nyuhé. Yén gumanti katara mamaling sinah tepakanga kulkul, jag sinah urip mangemasin. Mula kéto dadi jelma, lamon suba kadung ngrangsuk keputusan dusta, mula setata kenehé numan nyuang gelah anak. Taén ada wadésané tengah lemengé sambrag malaib uli di cariké, tungkula ia unuk-unuk ngembahang yéh ka carikné, sagét ada kadungkun-dungkun angkab-angkab teka uli kelod, mara sawatara
