32 | Wayan Sadha
Bekel Manumadi
Jagaté mula pangenahné asri tur kalintang becik makada iraga gargita ngajinang. Tan bina kadi taman Ida Sanghyang Indra ring suwargan, jag asing ngiwasin setata ngulangunin, miribné tusing ada pakéweh ané pacang kapanggih, Ané makada idéwék manumadi di jagaté mula setata kadén lakar nepukin pemandanganané melah, mapan idéwék kaarad tekén tresna asih lan kasemarané imémé ajak ibapa. Cara bukité johin pangenahné mula alus mulus tuara céda, kuala yén suba paekin sinah pesan bruntugan cara umah tabuan sirah jag pabrenyet. Kéto masi unduk panumadiané sasubané teked dini di jagaté, liu pesan pakéwehé nyadang, sahasa lakar nyengkalén. Kuala yén suba iraga tragia nangkepin sakancan pangeresé, sinah iraga prasida ngalangkungin, sakadi ujiané satondéné katempuh anak mula ngranang bayuné runtag. Makejang totonan tusing ada bédané tekén temitisané di guminé, anak mula “suba asuba karma” ané dadi sutradara panumadian.”
Kéto grenggengané Nang Locong nyongkok di batan punyan tiyingé di teba luanan umahné sambilanga magecel, bibihné magageblusan ngroko cap gedong batu. Disampingné ada kopi blancuk mawadah mok tekén keladi malablab acubék, ento pinaka panyemeng. Anak mulakéto tatadahan anaké ané lacur, kuala diapin kéto Nang Locong tuara ja taén maselselan tekén awak, diapinké uling sasukatné mapikuren ngajak Mén Locong tuara taén ngarasayang bagia, tuara taén nepukin dadaaran ané melah-melah. Cén ané madan melah? Ukuran melahé totonan anak relatif tusing kena baan ngukur, tergantung ja masi ane ngrasaang. Kondén karuan anaké sugih madaaran ane jaen-jaen, mapan takut yén ya madaar ané jaen miribné kasugiané lakar rered, kéto masi anaké ané lacur kondén karuan mantet ané garu-garu, diapinké ya neda dedaaran ané sarwa umbi, kuala ia bisa ngamertaang, bisa matur
