tusing ja kéweh mapan ia anak sugih, Mlajah ilmu listrik jadwalné duang minggu cepok. Sawiréh Pak Agus nawang Kak Badung tekén Nang Lotok tusing taén masrekenan mesuang pipis anggon mayah maguru, sabilang jadwal malajah tagina pipis nyang satak tali rupiah. Lénan tekén Nang Lotok ada masi ané ngamiluin ajaka patpat, makejang totonan soroh anak suba tengah tuwuh.
Kasuwén-suwén Nang Lotok Cs. marasa kerud, mapan sabilang latihan setata guruné nagih pipis. Diapinké Kak Badung tusing kéweh mapan ia anak sugih. Nang Lotok mara nyidang nyemak strum roras tali watt ngelaut suud mlajah, alasané tusing ngelah pipis. Apa buin Pak Agus setata nagih pipis pamelin lengis binsin. Sasubané Nang Lotok suud mlajah nyemak strum, Pak Agus biin ngéka-ngéka daya, kénkén baan apang nyidayang nyuang pipisné Nang Lotok tekén Kak Badung, mapan tusing nyak nugtugang mlajah nyemak strum listrik. Pak Agus suba kadung tuman malaksana corah, mula bakal tusing suud- suud ngéka daya kénkén baan nguluk-nguluk anak, kénkén baan apang nyidang mapikolih arta, kéto masi mapan tumbén maan murid loyar pesan mesuang pipis. Sawatara duang minggu Pak Agus sagétang biin ngenah kumah Kak Badung sambilanga makecah-kecah ngortang ibané bisa narik barang-barang sunia marupa kadutan, akik, permata mirah delima, lan sekancanin soca duwén anaké di suniané. Kak Badung anak kabenengan demen tekén barang-barang buka kéto, beh jag nyantép sajan dot mlajah narik barang ané oranga tekén Pak Agus.
“Titit lulalulit lulalulit...!”
“Om suasti astu..., sira niki?” kéto pasautné Nang Lotok nampi télpon.
“Om suasti astu..., rahajeng soré Nang Lotok. Tiang niki Kak Badung paswitrané ané paling raket.”
“Oh Pekak Badung, sampunapi orti?”
“Béh ada orta luwung sajan puk, Pak Agus bisa narik barang-barang sunia. Sing nyidang mai dinané jani Nang Lotok?” kéto patakoné Kak Badung uli ponsélné,
