Ajum-ajum Puwuh
Nang Lotok bengong mapangsegan negak ngelut entud palihatné nrawang sawa di durin pondokné. Carikné linggah pesan mara sajan alianga sekan mamula padi. Langité pelung kedas ngranang kalangen sakancanin jatmané anéngiwasin sawiréh pemandangané melah kadulurin ban anginé ngasirsir. Di ambarané ambuné putih kedas buka kapasé pajlompot mapinda wayang lan beburonan. Kedis perit lan kedis bondolé pasliwer marowang-rowangan pakeberné ngindang di duwur punyan padiné ané suba kuning, sabilang jahan nyander ngenceg mapésta padi. Kondén ada amenit sagétang makejang sambrag makebur sawiréh ia tengkejutanga tekén suaran kepwakané lan kliningan genjoné pagantung duwur cariké kedetina taliné tekén pianak petani ané ngemoin di cariké. Nang Lotok itep ngiwasin lawat binih padiné ané mara pamulana di umané di betén yéhé ning mawarna pelung ulian kena pantulan utawi lawat warnan langite. Apa buin sinar suryané senang maglanaran makada maweweh-weweh ka asrian pemandangan cariké. Diapinké pemandangané sarwa asri sarwa melah, kuala Nang Lotok boya ja rungu tekén melahnyané. Nang Lotok palihatné dogén joh kuala ia tusing klangen menikmati panorama buka kéto sawiréh ia tusing engsap tekén ragané bes kadrupon percaya tekén anak ané tuara melah tawanga. Kéné undukné:
"Titit lulalulit...lulalulit...lulalulit...!" kéto suwaran télepon genggamné Nang Lotok.
"Om suasti astu...! Rahajeng semeng, sira niki?"
"Suasti astu rahajeng mawali, titiang niki sametoné Kak Badung. Kénkén kabaré? Suba ngopi, Nang Lotok ?"
"Oh, Kak Badung. Tiang wawu san wusan ngopi, sampunapi gatrané tembé ngengkusin titiang?"
"Ada kejutan puk, Nang Lotok. Nyidang teka mai kumah tiang semengé jani?"
