KIDUNG PANJI SUMIRANG, GERIA GDE BALAYU, 60
75a|Wus prapta ring salu kilyan,
alungguh ring batha,
Radén Déwi tumut,
sirang Krettanatta,
éwwan ira tan sinipi. 195.
Radén Déwi ngling aris,
kaka Mantri sun anglakon,
mara ring Udyanna-puspa,
kakkanuntun asthanningwang,
Radén anawurin,
lumaku adawak iyayi,
ingsun ngeluh alemah lumampah,
Sang Dyah wirang jinumog,
umanjing siréng puri,
amungu ring binih ira. 196.
Kuneng sira Radén Mantri,
lwih ing lara kadalon,
yayajah pinuncang ing lara,
udani ring arin nira,
minusthi Sang Apanji,
75b|sok dén-ya anandang laki,
tuhu ring salyanning anun nira,
rengu ulat kalaron,
tan suddi manjing ing puri,
wétning panguncang ing lara. 197.
Kawarnna Radén Sumirang,
ring kutta-Wandira,
dalu sira apum,
ring Dyah Ratna-Puspa,
tumut ering Dyah Puspasari. 198.
Rahadén Déwi angucap,
duh mas mirah ingwang,
arin ingsun kalulut,
mangsulla sira,
sun apti atilat bhumi. 199.
Pan jatin ingsun wong istri,
witning Deha sun kalaron,
anamma Candrakéranna,
anmu lara-tibara,
marmmanning acawet laki,
Sang Dyah kalih anawurin,
duh singgih Sang Hyang Hyangning/
kusumma,
kahulapti anglakon,
saparanning lumaris,
yadyan prapta ring antaka. 200.
Radén Déwi angling angaris,
papareng yayi kelaron,
anuli ngamét pamelar,
kinenan niréng wilapa,
76a|ingulessan lungsir wilis,
moggha Radén Indu prapti,
janjin ira prapta sumepera,
ginangsal ering paturon,
rinurubbhan puspa-marmrik,
Rahadén Déwi lumampah. 201.
Pawongan niranut lampah,
norana wong wruha,
Dyah karo tinuntun,
wus adoh lumampah,
prapta wing sukun ing ukir. 202.
Mangké gumantya rahinna,
muni satta karunna,
Sri Madéwi ungu,
aninjo ring sutta,
sunn-ya rashan nikang puri. 203.
Mlayu Sri Mahadéwi,
angungsi maring paturon,
norana uryyan nikang wang,
awre bhushannan ira,
Sri Madéwi anangis,
baya nini atilar bumi,
tuhu tan ashih sira iringwang,
tumut ingsun kalaron,
tan kahanan gingsir,
mangké ingsun tinilaran. 204.
