petang dasa persen. Ebuh mekejang........ bungker-bungker tukang togoge.
Wayan Tamba enu masi nyongkek di batan warune ngisi togog. Bengong ia ngantenang kamelahan anake, aget anake idup. Awak lacur maan daah-duuh duen. Inget ia teken munyin timplane, eda bes sanget nolih menek, mentas batu cenik sing tepuk katanjung batise, matatu payu ja awake sakit padidian. Mara ia ukana nyandang togoge, laut ada montor honda mreren di sampingne. Toris mabok gading mreren, gede landung batisne lantang.
“Hello .....” torise ngorahang heloo ia manggutan makenyem.
“Heloo ....” bisa masi ia ngorahang heloo.
“What is that?” torise ngomong nakonang togogne, mesti ia nakonang unduk togogne, baan limanne nudingang togog.
“Stecu ... Sir.” Ja taen ningeh cerik-cerike ngorahang stecu yen ngancung-ngancungang togog sig torise ane liwat, togog kone statue bahasa Inggrisne, Torise laut tuun tur nongkrak montorne terus nuju sig togogne.
“Good. ...,” torise ngomong padidiana,
“You will sell... how much the price,” torise nudingang togoge. Ia kipak-kipek sing nawang apa, apa kaden ane omonganga teken torise Ia inget anggul-anggut duen, telah peluhne pesu miriban seken pesan keneh torise ene bakal meli togoge, melahang pesan mriksa, tur buin uling joh tlektekina buin paakina laut buin ia ngomong ane cara mara tunian orahanga, apa kaden artinne, kepras-kepris duen dingeha. Torise dot pesan ia bakal mej ( keto kenehne ulih sebeng torise ane Sanget pesan nlektekang togoge ).
“How much,” torise buin anggut-anggut. Ia nengil telah pesu peluhne, Laut teka pelayan Art Shop ngajak torise apang masuk ke tokone, nagung torise sing nyak, ia enu neneng togog Betara Siwa Matriwikrama. Buin Torise nolih wayan Tamba cara anak nyekenagn sebengne. Made Gita Pelayan Art Shop ngomong kepras-keprus ajak torise limane tudang-tuding, miribang nyatuaang arting togoge, mingkinang torise bengong tur dot pesan.
