Mekejang kedek masem baan lacure, gepe ungkat-ungkit teka anake ngelah pipis, Art Shop ane gede, mekejang wadana, payune dadi mudah-mudah mekejang. Togog....kayu tabasin aji keneh, aji saat .....apa duen nyidaang mapinda ...... nanging lacure mekejang mapipis.
Kuyu sebengne Wayan Tamba pesu uling Art Shop ” Supraba.” Enduk pajalanne nyandang togog Betara Siwa matriwikrama. Patuhanga ajin togogne, ane gaena kodian. Tuah ja siman anak meli ngelah pipis, bes molas tali tupiah tagiha. Tuyuhe ngae abulan tengah, sing ja mulih pamelin nasine, apa buin ongkos ngae. Mawinan ia ngaba togoge ka Art Shop Supraba, bana Ida Bagus Sueca ane ngelahang Art Shope suba kasub pesan, baan kaluungan tur pilihan barangne. Bes ngencot yen kene goban togoge, juari nagih molas tali cara togog kodian. Kene suba senine jani, seni kaukur aji pipis. Ban kenyel tur gedeg sebet kenehne, mreren ia ajahan di batan warune di samping Art Shope. Togoge janga di batan warune. Ja nyongkok sambilanga ngisi togoge. Ada sawetara dasa montor sedane, mreren di aap Art Shope, buin lantas teka montor mickrobus, rame tamu Jepang tuun. Bengong ia ngantenang, kene ganti nake ngelah. Tamune pagrunyung sig tongos anake nunun, gaide kepras-kepris ngomong Inggris apa kaden orahanga, limanne tudang tuding, supir sedane suba ada maakin, cara ngaturin punggawa, tundena ka kamar cenik di samping Art Shope, mekejang kenyem-kenyem. Ditu suba sedia Seven Up, bir, roko Gudang Garam, 555 ada masi ane ngaba Dunhill. Ebuh supire,ebuh gaide, ecbuh ane ngelahang Art Shope.............. bangka tukang togoge.
Tamune suba menek ka montor buse, supire enu masi ngorta ajak peladen Art Shop ane bajang, kedek-kedek manis masumpang bunga cempaka. Supire kedek-kedek, teka gaide nyubitlimanne. Togoge ngranaang anake demen, kedek-kedek .......kemyem ..... Suba telah tamiune mekejang menek, gaide nolihkipak-kipek, supire masi keto, laut teka anak ngaba amplop ....... misi pipis.......tip... telung dasa, ada masi ane
