- 19 -
ada ane bakal saatanga.
Wayan Tamba negak bengong di bale dangin, nyender di parbane. Memenne mara pesan suud mabanten, jani tilem kapitu. Betara Siwa tedun ka mercepada kacepuk teken I Lubdaka ane sedeng bengong di punyan kayune. Tukang boros mula geginanne mamati-mati, nanging yen panakne ada anak ngebug, tan kodag pedih basangne. Menusa mula demen di luunge duen, Lubdaka bengong, sing tawanga beten ada lingga, Lubdaka ngentungang don, nunas ica ring Ida Betara Siwa ........
Wayan Tamba inget teken tutur Betara Siwa matriwikrama. Bengong ia mekelo, makesieg kenehne, mekita ia ngae togog mapinda Betara Siwa. Laut ia nyemak damar ganjrenge nglantas ka rompok dangin paone.
11
Ada kayu eben akeleng mlantang ameter, jujukanga tur budang badingina, laut ia anggut-anggut, dadi suba tur cocok amun nyet kenehne. Bakalanga aji kapur malu, corat-coret apang magoba amun nyetne. Nyemak ia timpas teteka bedik anggona pinget ortene. Gati pesan tur cara magesoan ia magae, kene yen pesu reragragan kenehne. Suba rata mapinget laut senderanga bakalan togoge di sakane. Makenyem-kenyem ia, baan kendel kenehne.
12
Memenne ngaba nasi ka bale dangin. Wayan Tamba limanne enu nyorat-nyoret, enu ngrambang togog Betara Siwa matrivikrama, Enu dadi keneh sanget pesan. kenkenang ngadungang tegeh togoge teken lantang kayune.
”Madaar ja malu Yan, kanggoang sing ada jukut.”
”Apa gen yang kanggo, meme suba madaar? ”
”Meme mara pesan di paon.” Wayan Tamba laut nyemak nasi ane mwadah piring sutra totonan. Misi be pindang teken pepel kacang. Apa ja ane sagianga teken memenne ia sing sanget mamidi, kanggo dogen.
”Me..... kenken itungan memene yen yang nyuang I Nerti ?
