- 18 -
”Ngudiang dadi tumben cai nakonang Galungan?”
”Kene me....,” ngangkreg pasautne gelip ia nyiup Kopi.
”Ah..... kene me..... lacur cange.... cang makita ngalih somah.
”Nyen ento... apang beneh masi ben ngorahin uwan-uwan caine.”
”Ento Nerti.... lad somahne Sudamia. ”
“Nerti....?” Memenne tengkejut.
” Eda meme tengkejut, suba kenehang cang mekejang”
Memenne nengil nguntul sing pesu munyinne. Wayan Tamba mrasa memenne bakal sing setuju, nanging ia nawang solah memenne sing ja nyangetang pesan, apa buin raganne jani suba madan kliwat tua. Mrasa ia teken memenne bakal sing setuju, krana ja nyuang baluan. Suba nyet kenehne, apa ja bakal orahanga ia sing bakal buung, apa buin ia ane ngalih gae, sing ja ngidih teken anak len.
"Yen suba keneh cai, meme tuut dogen,”” memenne laut ka paon, Wayan Tamba inget ia teken kenyemne Wayan Nerti. Japin ja sing ngelah jeg bakal baniang gen endasne. Madukan dadi besik di kenehne. Dugas mlajah nogog pidan masi sing nawang apa. Togoge masi kayu makelengan bakaine. Jeg bakalang duen, togog dadi, jeg paat duen, masi dadi ya majenengan jlema. Mekejang Masawang di kenehne. Laut ia tuun bakal masugi.
9
Rama sedeng nguber kidang emas ane edotanga teken Dewi Sita. Aeng tingkah polahne Patih Marica. Betara Kama ngrangsukin Dewa Rama awanan keto sanget tresnanne teken Dewi Sita mawinan ubere kidang emase. Suba sawatara joh Dewa Rama nguber kindang emase laut teka Rawana nyander Dewi Sita. Makeneh-keneh ia kenkenang ngejang Laksmana ane snidira teken ipahne bana sing nyak ngalih Rama. Kenkenang ngejang Laksmana dugas miyegan ajak Dewi Sita, kadena Laksmana edot teken Dewi Sita. Mekelo pesan ia makeneh bakal ngortenang papan kepelane ane mlantang duang meter tontonan bakal isinang satria Ramayana. Suba uling mekelo ia makeneh mara nyidaang ia nyemak, krana
