Cokor I Dewa ngaksi titiang. Titiang nunas ica ring Betara, mangda dados titiang jlema patut sane rahayu becik. Yan tan Betara ledang, becik pademang titiang iriki; jengah titiang dados jlema nyalahpara", keto liu aturne I Sigir, sambilanga ngelut cokor Ida Betara Surya, lantas ngandika Ida Betara, "Saja bapa ngrupaka cai. Krana kene lekad caine tuah asibak, ne malu memen caine salah nungginginira sedek majalan di ambarane, wireh ia sebet busan - busan nuunang menekang padinne, bakal jemuha sing maan ai, kaselag-selag baan ujan. Ento krana ia kajamah baan tejan bapane kilidin gulem, wastu beling, lekad kene cai asigir; da cai nyebetang. Da ja suba cai teka nunas panyupatan teken bapa, nah bapa lukata cai. Kema cai manjus mabresih di pasiraman bapane, ento ditu kema laku, ditu ada pancoran Sinduratna, kema ditu panjusang ibane, lamun suba keles kules caine ne, duduk aba mai!"
Nah suba jani keto, gelising satua, enggal kema kone ia manjus sig pasiramanidane Betara Surya, sig pancurane telung dasa telu liunne tur luih-luih sendangne, magenepan, ada ban mas, slaka, tembaga, kekuningan, sekancan totonan tur pada bungah masoca inten mirah manik, sakancan socane ada ditu; buina yehne muarna endah pada ening pesan, ento kone pepeda uli tanggu kauh baana manjusin, telah teked ka tanggune badangin. Pragat ia manjus napi keles kulesne, genep cara-caraning manusa ukudanne jani tur bagus alep buka Rejunane. Toliha awakne suba melah, suba genep, duduka kulesne abana buin ia nangkil ring Ida Betara; ngandika Ida Betara, "Nah ento sing luung suba cai? Kema jani cai mulih kalemah! Lamun cai predona baan memen caine, edengang kules caine! Jani apang melah cai mabikas, sing buungan cai sadia. Kema cai ngortaang pangandikan bapa, mani - mani yan ada anak luh langgana buin aketo nungging-nunggingin, kena sapa ia baan Dewa, wastu ngelah pianak salah, salah wetu. salah rupa, malapataka. Yan ada anak luh kalaning camah, ngulungang ngutang camahne di marga agung, kena sapa baan Betara Surya. Wastu sing dadi menyah, kasakitan ban rare. Patutne anake luh camah, yatna ngutana camahne, pang da sing jalan-jalan manongos, ngawe punah di gumi".
I Sigir matur, "Ratu, titiang ngiring, mangkin titiang mapamit". Suud madan I Sigir, jani madan Truna Bagus.
Tan kacrita di jalan, teked ia jumahne kala peteng, dapetanga korinne makancing, lantas togtoga sambilanga gelu - gelu, "Meme, Meme, Meme, ampakang jlanane, icang teka!"
- 121 -
