Kesusastran Bali Purwa
Angklung Gadang buin matur tekén Jero Klian, "inggih Jero Klian, nawegang antosang malih ajebos kéwanten, tiang jagi ngaturin ajengan Jero Klian kalih krama banjaré sami". Lantas masaut Jero Klian, "to Bapa ngelah nasi tuah awaregan lakar nagih ngingu anak abanjar, sing salah-salah icang ngidih bapa nasi?" Pan angklung Gadang masebeng jengah, lantas ngaukin kurenanné, "méméné, kema jemak pasepané enggalang!"
Ngéncolang bangun né luh nyemak pasepan tur suba kajangin api muah bungan asep, lantas enjuhina Pan Angklung Gadang, laut mulihan masa, ngasepin tungkedé né mapontang. Suba suud ngasepin, lantas ia ngomong tekén kurenanné, "nah jani yatnain iban nyainé nglungsur paican Ida Betara!" Né jani Pan Angklung Gadang buin mapinunasan, "inggih Ratu Betara, titiang mamitang ajengan tigang sok". Lantas slamparanga tungkedé, ngwér, grodag, ulung di langgatan mambengné, nregeng kurenanné menékang ka langgatan tur nuunang nasi telung sok.
Lantas duduka tungkedné, tur ia jani nunas lawar acubék, laut buin slamparanga tungkedné, "ngwer, klesok", ulung di langgatan paoné, né luh ngatéplak bangun menékang ka langgatan paoné tur nuunang lawar acubék. Buin Pan Angklung Gadang nuduk tungkedné, lantas slamparanga tungedné. "ngiur, gredang". Ulung di glebegné, lantas bintit kurenanné nyemak jan lantas menékin glebeg tur nuunang jukut, jejeruk muah gegecok. Suba koné pepek pada tragia, laut kagibungang banjaré pada madaar acepokan.
Kacerita duk totonan ada anak ané sugih gati bareng ditu masagi, ia madan I Giur, ngantiang magegaénan ngotonin pianakné buin limang dina. Dadi prajani I Giur dot tekén tungked Pan Angklung Gadangé. Lantas lemesina Pan Angklung Gadang tagih belina tungkedné aji alakasa, buin unjuk-unjukina tekén I Giur, kanti aji lebak sepaa, mara baanga tekén Pan Angklung Gadang. Lantas ngencolang I
71
