Kesusastran Bali Purwa
déwékné kasengitan baan Ida Anake Agung. Mapamit lantas ia budal, kacerita suba neked jumah, matakon lantas kurenanné, "beli, kenapa sebeng beliné dadi masawang sedih? Kénkén sih tingkah beliné tangkil di puri?"
Masaut I Raréangon, "kené adi, sinah suba baan beli Ida Anaké Agung tan arsa pesan tekén beli. Suba beli nyidaang ngalih I Lubangkuri, jani buin beli kapangandikain ngalih macan."
Masaut né luh, "yan batas akéto, da beli sanget ngéwehang! Né tiang ngelah manik astagina, paican dané bapa. Jani tiang ngadakan macan. Manik astagina apang ada macan!" Ada lantas macan gede pesan.
"Nah kema beli ka puri tegakin macané né, aturang tekén Ida Anaké Agung!"
Tegakiné lantas macané ento ka puri, teked di puri, sedek Anaké Agung katangkilin para janané, serab koné pada anaké nangkil, Ida Anaké Agung jejeh mangetor nyingakin macan, buin pada sengap macané ento gereng-gereng.
"Gediang-gediang!" kéto pangandikan Ida Anaké Agung sambilang ida malaib ngapuriang. Gediang lantas koné macané tekén I Raréangon, tegakina abana mulih. Teked jumahné macan ento lantas pastuna tekén kurenanné, apang dadi lesung. Dadi lantas macané ento lesung. Buin maniné buin koné I Raréangon kaséngan ka puri. Ngandikan Ida Anaké Agung tekén I Raréangon, "cai Raréangon, kema alihang gelahé naga! Yén cai tondén maan naga, da cali melipetan mulih!" Ngiring koné I Raréangon, lantas ia mapamit budal Teked jumahné morahaan ia tekén kurenanné. Ditu lantas kurenané nyemak manikné. "Manik astagina apang ada naga!" Ada koné naga gedé pesan. Tegakina lantas nagané tekén I Raréangon ka puri. Ngokok koné nagané ento salantang jalan. Suba neked di bancingah, nglepat ikut nagané bakat pentala koné candi bentaré, aas candi pamedal Ida Anaké Agung. Anaké di bancingah pada pablesat malaib.
49
