Kesusastran Bali Purwa
Kacerita pabianane Pan Tuung Kuning karusuhin baan bikul. Ane ngrusuhin, bikul kadaden rabi Mantri Koripan. Dening sai-sai pabianane Pan Tuung Kuning karusuhin, ngomong lantas Men Tuung Kuning. Bapanne-Bapanne, jalan ja kenain jeet ane ngrusuhin pabiananne, lan!"
"Jalan," keto abetne ane muani. Makena lantas ia jeet di pabiananne.
Kacerita teka lantas I Bikul nglincak di pabianan Pan Tuung Kuning ngalih tuung, kesela muah ane len-lenan. Dadi kena jeet kone lantas I Bikul.
Pan Tuung Kuning nelokin jeetne ka bianne, depanga lantas I Bikul kena jeet suba mati. Bikule ento mamua jlema, mawak bikul. Embusa kone bikule ento tur entunganga di padang-padange.
Kacerita kone jani Mantri Koripan. Dening suba makatelun rabin idane tuara rauh, lantas Ida ngrereh mailehan. Panggihin Ida lantas bangken bikul maan kena jeet, nanging tusing uningina ento kadaden rabin idane. Dening kanti makelo Ida mailehan ngrereh rabin idane masih tusing panggihin Ida, lantas Ida mantuk. Di subane Ida rauh di puri, mataken lantas okan idane. " Aji aji, dija nika i biang?"
Masaur lantas ajin idane, "beh cening, biang ceninge anak luas i telun, kayang jani tonden teka. Aji suba ja ngalih mailhan nanging tusing tepuk.
Mara keto pangandikan ajine, lunga lantas Raden Galuh ngrereh biange.
Tan kacerita pamargin Raden Galuh, kapanggihin lantas bangken bikule. Dening uningin Ida bikuleento kadanen biange, ditu lantas Ida nangis sambilanga Ida ngendingin biangne, Mara biang seda kutanga di padang-padang, mara i guru upahanga gong gambang. Begbeg keto dogen gegendingan idane. Suba jani sanja mantuk kone Raden Galuh. Mara Ida rauh di puri takenina lantas teken ajin idane, "Cening Galuh kenapa dadi bengul mara teka?.
41
